Dare repamusoro-soro munyika reConstitutional Court nhasi rarasa chikumbiro chakasvitswa kudare iri nevakakwikwidza vakamirira MDC Alliance musarudzo yemumiriri weChegutu West muparamende, VaGift Konjana, chekuti kusarudzwa kwakaitwa VaDexter Nduna senhengo inomirira Chegutu West muparamende kusendekwe parutivi.
Dare iri rati VaKonjana havana nyaya ine huremu hwekuti VaNduna vanzi havana kusarudzwa zviri pamutemo kuve mumiriri weChegutu West muparamende
VaNkonjana vakakwidza nyaya iyi kumatare vachiti komisheni inoona nezvesarudzo yeZimbabwe Electoral Commission, ZEC, yakakanganisa payakazivisa veruzhinji kuti VaNduna ndivo vakange vakunda musarudzo kunyange hazvo VaKonjana vakanga vakunda musarudzo idzi.
Pakambonzwikwa nyaya iyi mumatare akaita sedare reHigh Court neSupreme Court, magweta eZEC akabvuma kuti komisheni iyi yakakannganisa payakazivisa kuti VaNduna ndivo vakange vakunda musarudzo pakatariswa zvakabuda musarudzo zvairatidza kuti VaKonjana ndivo vakakunda musarudzo.
Vatongi dedare reCobstitution Court vati VaKonjana havana kodzero dziri mubumbiro remitemo dzakatyorwa saka nokudaro nyaya yavo haina huremu hwekuti inzwikwe nedare iri izvo zvatsinhirwa negweta ravo VaMoses Nkomo.
Mutauriri weMDCT, VaWitness Dube, vati havana kufara nemutongo waturwa nedare.
Asi VaNduna vati vafara nemutongo waturwa nedare.
VaKonjana vati vanhu vemuChegutu West ndivo varwadziswa zvikuru nemutongo uyu sezvo vasiri kumirirwa nemunhu wavakasarudza.
Mutongo waturwa nedare uyu unoreva kuti VaNduna vacharamba vari mumiriri weChegutu West muparamende sezvo VaKonjana vasisina kumwe kwekuenda kuti nyaya yavo inzwikwe.
Facebook Forum