Zvikwata zvemauto eZimbabwe National Army zviri muPremier Soccer League zvave kusiya Harare zvichinotambira mumaguta madiki senzira yekutsvaga vatsigiri vakawanda.
Zvikwata zve Black Rhinos neCranborne Bullets zviri kusiyana neHarare zvakananga kumaguta madiki uko zviri kutarisira kuwana vatsigiri vakawanda kudarika vashoma-shoma vanga vachiuya kuzoona mitambo yezvikwata izvi muHarare.
Black Rhinos yakananga kuBindura kunoshandisa Trojan Stadium, panguva iyo Cranborne Bullets iri kuenda kuMarondera, uko ichanoshandisa Rudhaka Stadium.
Zvikwata izvi zviri kutarisira kuwana vatsigiri vakawanda mumaguta aya pane muHarare umo zviri kutorerwa vatsigiri nezvikwa zvine mukurumbira zvakaita seCaps United neDynamos.
Pamusoro peCranborne Bullets, Black Rhinos, Caps United neDynamos, muHarare mune zvimwe zvikwata zvinoti Harare City, Herentals neYadah.
Zvikwata zvidiki muHarare zviri kuwana vatsigiri vashoma shoma vasingakwanise kuzvipa mari yekurarama pese pazvinotamba.
Mimwe mitambo yacho iri kuunganidza vateveri venhabvu vasingasvike zana, kunyange hazvo mari iri kubhadharwa pamagedhe isina kuwanda.
Sachigaro weCranborne Bullets, VaDouglas Gwite, vanoti vari kuda kuvaka mhuri yakakura yevateveri vavo kuMarondera uko kwave nenguva yakareba kusina nhabvu yepamusoro-soro inotambirwa ikoko.
Murairidzi weChipembere, Hebert Marowa, anoti vachaita nepese pavanogona napo kuti vakunde mumitambo yavo kuitira kuti vatore moyo yevateveri venhabvu muBindura.
Aka hakasi kekutanga Black Rhinos ichibuda muHarare mushure mekumboshandisa nhandare yeRimuka Stadium muKadoma makore mashoma apfuura.
Marowa anoti kunyange hazvo vasati vaziva kuti mitambo ichatanga rinhi, gadziriro yavo iri kuenderera mberi vatambi vachishanda vari mudzimba dzavo.
Kunyange hazvo mimwe mitambo yakaita sekiriketi, tenesi, mijaho yemabhiza, kutuhwina, nekumhanya, yakapihwa mukana wekudzoka panguva yeCovid-19 lockdown, nhabvu, tsiva, basketball, nemimwewo mitambo, haisati yabvumidzwa nehurumende.
Asi muongorori wemutambo wenhabvu, VaKelvin Mushonga, vanoti vachitarisa matengerwo akaitwa vatambi nezvikwata, nhabvu yemwaka uno ichanakidza zvikuru.
FC Platinum yekuZvishavane ndiyo ine mukombe wePremier Soccer League uyezve ndiyo yakautora muna 2017 na 2018.
Facebook Forum