Accessibility links

Breaking News

Varwiri veKodzero Vashanu Vanobvisiswa Mari yeChibatiso


Kumbirai Mafunda from the Zimbabwe Lawyers for Human Rights says is hopeful that the high court will release the activists on bail, June 3, 2019.
Kumbirai Mafunda from the Zimbabwe Lawyers for Human Rights says is hopeful that the high court will release the activists on bail, June 3, 2019.

Nhengo shanu dzinorwira kodzero dzevanhu dzakasungwa mwedzi wapera dzikapomerwa mhosva yekuronga zvekupidigura hurumende yaVaEmmerson Mnangagwa mushure mekupinda musangano wezvekodzero dzevanhu kuMaldives, dzapihwa nedare repamusoro mukana wekubhadhara chiuru chemaRTGS pamunhu semari yechibatiso kuitira kuti dzitongwe dzichibva kumba.

Vachitura mutongo wavo pachikumbiro chakasvitswa nevasungwa ava vanoti VaTatenda Mombeyarara vesangano reCitizens Manifesto, VaGeorge Makoni vesangano reCentre for Community Development in Zimbabwe, VaNyasha Frank Mpahlo vesangano reAmnesty International Zimbabwe, VaGamuchirai Mukura vesangano reCommunity Tolerance and Developmentpamwe naMuzvare Farirai Gumbonzvanda vesangano reRosaria Trust, mutongi wedare, VaTawanda Chitapi, vabvumburudza nyaya yehurumende vachiti hurumende inofanira kuchengetedza kodzero dzevanhu zvikuru seyi mapurisa paanosunga vanhu.

VaChitapi vashora mapurisa nekupamba ma computer nembozhanhare dzevasungwa isina magwaro anovabvumidza kuita izvi uye nekutadza kuudza vasungwa chikonzero chekuvasunga panguva yavakasungwa sezvinotaurwa nebumbiro remitemo.

Mutongi ati kunyange hazvo vasungwa vasina kukumbira dare kuti riture kuti masungirwo avakaitwa ari kunze kwemitemo, vasungwa vane mukana wekuendesa hurumende kumatare kuti varipwe.

VaChitapi vati vasungwa ava vabhadhare chiuru chimwe chete chema RTGS pamunhu wegawega semari yechibatiso uye kuti vagare pakero dzavakanyoresa kudare pamwe nekuzvipira kumapurisa ari pedyo nekero dzavakanyoresa kudare.

VaChitapi vatiwo hapana humbowo hungavhiringidzwe nevasungwa sezvo vakatorerwa mbozhanhare dzavo pamwe nema computer panguva yavakasungwa sezvo zvinhu izvi zviri mumaoko ehurumende.

Zvaturwa nedare zvatsinhirwa nerimwe remagweta ari kumirira vasungwa ava, VaJeremiah Bamu.

VaBamu vati vafara nemukana wapihwa vasungwa ava kuti vatongwe vachibva kudzimba dzavo.

Mukuru wesangano remagweta anorwira kodzero dzevanhu, reZimbabwe Lawyers for Human Rights, Amai Rose Hanzi, vati vafara nezvaturwa nedare panyaya yekuchengetedza kodzero dzevanhu vakati mapurisa anofanira kuona kuti atevedzerawo zviri mubumbiro remitemo mukuita basa rawo.

Mutauriri weZimbabwe Lawyers for Human Rights, VaKumbirai Mafunda, vakaudza Studio7 neChina kuti vaitarisira mutongo wakanaka pavasungwa vari kumirirwa nesangano ravo.

Zvichakadai, chikumbiro chevamwe varwiri vekodzero dzevanhu vaviri avo vanoti Muzvare Stabile Dewah naAmai Rita Nyamupinga, avo vari kupomerwa mhosva imwecheteyo, chekuti vapihwe mukana wekubhadhara mari yechibatiso chakatarisirwa kunzwikwa neMuvhuro mudare repamusoro.

Hurumende inoti vasungwa vese ava vakapinda musangano kuMaldives wakarongwa nerimwe sangano rekuSerbia rinorwira kodzero dzevanhu rinodaidzwa kuti Centre for Applied Non Violent Action and Strategies kwainoti vasungwa ava vakadzidziswa zvekupandukira hurumende vachishandisa pfuti diki, nzira dzekutiza nadzo kusungwa munguva yekuratidzira pamwe nekuita zvechitororo.

Asi vasungwa ava vanoti havana mhosva yavakapara vachiti musangano wavakapinda waive wakanangana nekurwira kodzero dzevanhu.

please wait

No media source currently available

0:00 0:03:12 0:00
Pekupinda Napo Kuti Muone Zvamuri Kuda

Facebook Forum

XS
SM
MD
LG