Sangano rinomirira vashandi reZimbabwe Congress of Trade Unions, ZCTU, rinoti riri kuenderera mberi nehurongwa hwaro hwekuti vashandi varatidzire neMugovera muguta reChinhoyi, zvichitevera kupiwa kwarakaitwa rutsigiro rwemapurisa achachengetedza runyararo.
Vakafanobata chigaro chemunyori mukuru wesangano iri, VaGideon Shoko, vanoti sangano ravo rakatadza kuenderera mberi nekuratidzira svondo rapera mushure mekunge mapurisa ati akanga asingakwanisi kuvachengetedza sezvo mumwe mutevedzeri wemutungamiri wenyika, VaEmmerson Mnangagwa, vakanga vachishanyira guta iri.
Svondo rapera ZCTU yakaronga kuratidzira muHarare, Mutare, Gweru, Bulawayo neChinhoyi, asi kuratidzira kwemuHarare kwakavhiringidzwa nemapurisa kukatadza kubudirira.
Vashoko vanoti vave kuronga kuti kuratidzira uku kuitwe Mugovera wesvondo rinouya musi wa 22 Nyamavhuvhu.