Sachigaro vesangano re APEX Council, Amai Tendayi Chikowore, vanoti vashandi vari kuenderera mberi nekuramwa mabasa sezvo zvichemo zvavo zvisati zvagadziriswa nehurumende.
Amai Chikowore vanoti vashandi vehurumende vachasangana kuHarare Gardens neChishanu, apo vachazeya mafambisiro avachaita kuramwa mabasa kwavari kuita pari zvino.
Vashandi vehurumende vakatanga kukanda mapadza pasi musi wa 5 Kukadzi vachiti hurumende iwedzere mari dzavanotambira kusvika pamazana matanhatu nemakumi matatu emadhora ekuAmerica pamwedzi.
Asi hurumende inoti haikwanisi kubhadhara mari idzi, sezvo isina mari iri kudiwa nevashandi ava.
Vamwe vashandi vehurumende vanonzi vawana mari dzavo neChina dzakawedzerwa nemari inoita madhora gumi nematatu kusvika pamadhora makumi maviri nerimwe.
Asi Amai Chikowore vati havakwanisi kutaura nezvemari iyi, sezvo vari kungonzwawo kuti ndizvo zvaitika. Vati vachataura pamusoro penyaya iyi kana vaudzwa nemasangano avanomirira zvinenge zvaitika.
