Bazi rinoona nezvekuburitswa kwemashoko raburitswa padandemutande raro reTwitter kuti vanhu zana nemakumi matatu nemapfumbamwe vafa kusvika pari zvino nedambudziko reTropical Cyclone Idai.
Vanhu zana nemakumi masere nevapfumbamwe havasi kuzivikanwa kuti vari kupi uye vamwe vanosvika zana nemakumi matanhatu vari muzvitsuwa vakamirira kununurwa.
Mutauriri werimwe bazi reUnited Nations reWorld Food Programme kana kuti WFP VaHerve Verhoosel vati ongororo yavakaita nezuro inoratidza kuti vanhu zviuru mazana maviri muZimbabwe vakaputsirwa dzimba uye vanoda rubatsiro nechimbi chimbi.
WFP inoti kuChimanimani, zvikamu makumi mapfumbamwe kubva muzana zvezvivakwa zvakaputswa dutumupengo iri.
Amai Solinda Ngwenya vekuBulawayo vanoti vakarasikirwa nemhuri yehanzvadzi yavo yese yainge iri kuChimanimani ichiita mabasa ekuparidza shoko raMwari.
Zvichakadaro, vamwe vanhu vakawirwa nedambudziko iri vanoti havasati vawana rubatsiro.
Vamwe vanoti hurumende yeZimbabwe iyo ine zvikopokopo zviviri chete zveAir Force zviri kuManicaland inenge iri kuremerwa nezvinhu zvawedzerwawo nekuti migwagwa nemazambuko zvakaparadzwa.
VaBrighton Nyanisi vari muWard 14 kuChipinge East vanoti havasati vawana chikafu kubva nemusi weMugovera.
Mashoko aya atsinhirwa nemumiriri wenzvimbo iyi mudare reparamende, VaMathew Mlambo veMDC.
Asi vachitaurawo nezvechikafu, gurukota rinoona nezvevashandi nemagariro evanhu Doctor Sekai Nzenza vanoti nyaya yekuparara kwemigwagwa nemazambuko ndiyo iri kupa kuti chikafu chitadze kusvika kune dzimwe nzvimbo. Asi vati vari kushanda zvakasimba kuzvigadzirisa.
Facebook Forum