Mumwe sachigaro eCOPACc akamirira MDC inotungamirwa naVaMorgan Tsvangirai VaDouglas Mwozora vave kutarisirwa kumiswa pamberi pedare mwedzi unouya vachipomerwa mhosva yekunyomba mutungamiri wenyika VaRobert Mugabe pasi pemutemo wePOSA.
VaMwonzora vanonzi vakataura mashoko ekunyomba aya muna 2008 vachiti VaMugabe chikwambo uye vakati vachamhanya.
Asi VaMwonzora vanoti havana kutaura mashoko aya uye zviri kuda kuitwa ndezvematongerwo enyika zvekuda kuvhiringidza kunyorwa kwebumbiro idzva remitemo.
Mapurisa akaedza kupa VaMwonzora masamanisi mwedzi wapera asi zvikaramba. VaMwonzora vanonzi vave kutarisirwa kumira pamberi pedare musi wa29 Gumiguru mushure mekutenderana kwegweta ravo, mapurisa nemuchuchusi wehurumende.
Nyanzvi munyaya dzezvematongerwo enyika dzinoti Zanu-PF iri kuratidza pachena kuti shiri ne muririro wayo hairegi.
Nyanzvi idzi dzayambira kuti izvi zvinogona kukanganisa hurumende yemubatanidzwa sezvo mapurisa ari kuramba achishungurudza vanhu veMDC asi veZanu-PF vachiita madiro ajojina
