Mutungamiri webato guru rinopikisa reMovement for Democratic Change, VaNelson Chamisa, vati nyika yarasikirwa zvikuru nekushaya kwemutungamiri webato reZAPU, VaDumiso Dabengwa.
VaDabengwa vashayikira kuNairobi, Kenya vari munzira kuenda kumusha vachibva kunorapwa kuIndia.
Vange vave nenguva yakareba vachirwara.
VaChamisa vati VaDabengwa igamba renyika zvisina mubvunzo vakati chaiva chipangamazano chaipanga pasina kutarisa kuti munhu abva kubato ripi.
Gore rapera, VaDabengwa vakabuda pachena vachiti vaitsigira VaChamisa musarudzo yemutungamiri wenyika.
Mashoko aya atsinhirawo nemunyori mukuru mubazi rezvekuburitswa kwemashoko, VaNick Mangwana, avo vati hurumende inoremekedza zvikuru mabasa akabatwa naVaDabengwa.
Vatiwo hurumende yange ichivabatsira pavange vachirwara semunhu akarwira nyika uye aimbova gurukota rehurumende.
Vachitaurawo neStudio 7, VaMax Mkandla, avo vakashanda naVaDabengwa kuZipra munguva yehondo, vati vaive munhu ainge akazvipira kubatsira vanhu.
Vaive nhengo yeZANLA High Comman munguva yehondo, VaBernard Manyadza, vatiwo VaDabengwa vainge vari munhu aida kuti vanhu vabatane munyika kuzadzikisa zvakarwirwa hondo yeChimurenga.
Facebook Forum