Gurukota rezvemari, VaTendai Biti, vari kutarisirwa kubuditswa muchipatara neChitatu mushure mekupinda mutsaona kuChegutu apo motokari yavo yakaroverwa nerori ikapidiguka zvekuti yakabva yaparara zvekusagadzirika.
Vane ruzivo nezviri kuitika vanoti VaBiti vakaendeswa kuAvenues Clinic neChipiri manheru mushure mekunge vamboendeswa kuchipatara chekuChegutu.
Mutauriri wemapurisa, Supritendant Andrew Phiri, vanoti mapurisa achiri kuferefeta nyaya yetsaona iyi.
Mutauriri weMDC, VaNelson Chamisa, vanoti vafara kuti VaBiti havana kukuvara zvakanyanya munjodzi iyi uye vanotarisira kuti vachatungamira nhaurirano pakati pemapato ose ari muhurumende dziri kutarisirwa kutanga neChina. Nhaurirano idzi ndedzekugadzirisa misariridzwa yezviri kunetsa muhurumende yemubatanidzwa.
