Chikwata chekiriketi cheZimbabwe A chiri muCanada pari zvino umo chiri kutarisirwa kutamba pamutambo wekutanga neChipiri mumukombe weIntercontinental Cup.
Kunyange hazvo Zimbabwe iine mutambo neCanada, kumusha sangano reZimbabwe Cricket rinoti richatanga chirongwa chekudzidzisa varairidzi vemutambo wekiriketi muzvikoro kuitira kuti vadzidzise vechidiki mutambo uyu.
Chirongwa ichi chiri kutarisirwa kutanga kwaMutare neChipiri.
Varairidzi makumi matatu vari kutarisirwa kunge vari pachirongwa ichi. Sangano reZimbabwe Cricket rinoti richashandisa chirongwa ichi kuti riyedze kudzidzisa vadzidzisi vachazoenda muzvikoro umo vachapawo ruzivo rwavo kune vana vechikoro vazhinji.
Vanoona nezvekufambiswa kwemashoko musangano reZimbabwe Cricket, VaJeffrey Murimbechi, vanoti hunyanzvi huchadzidzwa huchabatsira mukusimbaradza mutambo wekiriketi.