Sangano reZimbabwe Football Association, ZIFA, rinoti rambomisa basa Chief Executive Officer varo, Muzvare Henrietta Rushwaya, kuitira kuti vaferefete nyaya dzehuwori dzanga dzichiitika musangano iri.
Sachigaro veZIFA, Va Cuthbert Dube, vanoti Muzvare Rushwaya havana kudzingwa basa asi kuti vambomiswa kuitira kuti nyaya iyi inyatsoongororwa zvakanaka.
Muzvare Rushwaya vanoti havasati vave kuda kutaura nezve nyaya iyi, asi vachazotoura mune ramangwana.
VaRushwaya vari kupomherwa mhosva yekuita zvehuwori gore rapera nemamwe masangano enhabvu ekuAsia uko vanonzi vakapihwa mari yekuti chikwata cheZimbabwe Warriors chitadze pamitambo yacho.
Vamwe vatsigiri venhabvu vanoti vari kufadzwa nezviri kuitika muZIFA sezvo zvichaita kuti huwori huite hushoma.
Mumwe mutsigiri wenhabvu, VaFabian Mahembe, vanoti huwori ndihwo huri kuuraya bhora munyika uye vanofadzwa nedanho ratorwa neZIFA mukuyedza kugadzirisa zvinhu.
