Sangano rePremier Soccer League, PSL, rinoti razivisa zvikwata zviri pasi paro kuti mitambo yenhabvu yange yakatarisirwa kutambwa pakati peSvondo, yambomiswa kuitira kuti sangano iri rinzwe kubva kuZIFA kuti chikumbiro charo chekuti mitambo yepati pesvondo imiswe, chakatambirwa here kana kuti kwete.
Munyori anoona nezvekurongwa kwemitambo mu PSL, VaBeadle Gwasira, vanoti mitambo yesvondo rino yambomiswa.
Asi vati mitambo iyi ichaenderera mberi svondo rinouya kusvikira ZIFA yaita musangano kupera kwemwedzi unouya wekuzeya mafambisirwo achaitwa mitambo iyi.
Zvikwata zvinoti hazvisi kuwana mari yakakwana kana mitambo ikatambwa pakati pesvondo sezvo vanhu vazhinji vanenge vari kumabasa panguva inotambwa mitambo iyi.
