Mutungamiri weAmerica, VaBarack Obama, vakakurudzira kubatana kwevana veAmerica, pavakashanyira chechi yechitendero che Islam muBaltimore, Maryland neChitatu.
VaObama vakashanyira kekutanga Islamic Society of Baltimore, kubva pavagadzwa semutungamiri wenyika.
VaObama vakaudza vatendi vechechi iyi, vanova ma Muslim vachiti, “tiri mhuri yeAmerica imwe chete.” Vakazivisawo nezvekushungurudzwa kwevechitendero ichi muAmerica nevechitendero ichi vanopfurikidza mwero.
VaObama vakati "munzvimbo dzinogara ma Muslim munyika yose, ino inguva yekushushikana, chokwadi ndechekuti inguva yekumwe kutya. Sezvizvarwa zveAmerica zvose, munoshushikana nekutyisidzirwa nezvehugandanga. Asi pamusoro pazvo, sema Muslim emuAmerica, mune zvimwe zvinokunetsai, sezvo mamugere mese munonangwa pamwe nekupomerwa kuita zvehugandanga zvinoitwa nevashoma".
Mutungamiri we America vakatenda ma Muslim emuAmerica nekubatsira mukuvaka America pamwe nekuita kuti isimbe.
Vasati vataura mashoko avo, VaObama vakanzwawo zvinetswa zvevatungamiri vema Muslim pamusangano wavakaita navo.
VaObama vakataurawo nevechidiki vechitendero ichi, vakavakurudzira kuti varambe mashoko epadandemutande ari kuvati vasarudze pakati pechitendero chavo kana kuti kutsigira nyika yavo.
Vachitaura neChina pamusangano wepagore we National Prayer Breakfast muWashington DC, VaObama vakatsinhira zvakare mashoko avo ekuti kutenda kunogona kubatsira mukukunda kutya nekuti kwabatsirawo sei ivo mubasa ravo rekutungamira nyika.