Nzira yeNigeria kuma 2018 World Cup finals yakasvika kumagumo nezuro manheru.
Nigeria, Egypt neMorocco dzave munzira kudzoka kumba apo mitambo iyi inopinda munharaunda yechipiri.
Vateveri venhabvu muZimbabwe nemuAfrica yese, avo vanga vachizadza nzvimbo dzekuonera makundano e2018 World Cup, vari mukuchema mushure mekunge maSuper Eagles akabudiswa mumakwikwi aya nezuro manheru panguva iyo zvairatidzika kuve nyore kuenderera mberi.
Veruzhinji vaive vototarisira mhemberero apo maSuper Eagles aive akaenzana zvibodzwa 1-1 neArgentina asi chikwata ichi chakakandwa kwasara maminitsi matanhatu chete ndokurohwa 2-1 nekubatana neEgypt, ne Morocco, kudzoka kumba.
Asi vakaona mutambo uyu vanobvuma kuti maSuper Eagles akaita nepese pavanogona kuti vakunde mumutambo uyu asi kuti rakanga risiri zuva ravo.
Kubuda kwemaSuper Eagles kwave kureva kuti Africa yasara nechikwata chimwechete Senegal chichiri nemukana wekuenderera mberi nemakundano aya apo iri kusangana neColombia neChina.
Chimwe chikwata chemuAfrica chichiri nemutambo iTunisia iyo iri kusangana nePanama neChina zvekare, asi hakuna kwaichaenda.
Asi muzvina bhizimisi uyezve vari muteveri wenhabvu akasimba, VaWilfred Munamati, vanoti havasi kuona paine chimuko kubva kuzvikwata zvemuAfrica kubva kumakundano aya.
Pari zvino, zvikwata zvabudirira kuenderera mberi nemakwikwi aya iRussia, Portugal, Uruguay, Spain, France, Croatia, Belgium, England, Denmark, Mexico, ne Argentina.
Nharaunda yechipiri iri kutanga neMugovera apo Portugal iri kusangana neUruguay.
Zimbabwe haina kukwikwidza muma 2018 World Cup mushure mekudzingwa mumakwikwi aya neFifa nemhaka yekutadza kubhadhara murairidzi wekuBrazil, José Claudinei Georgini aizivikanwa nezita remadunhurirwa rekuti Valinhos, mari yake yemuhoro.
Facebook Forum