Nhumwa yeKimberly Process, VaAbbey Chikane, vanoti mumwe mupurisa mukuru mu South Africa nekambani yeAfrican Consolidated Resources, iyo yakadzingwa kuminda yemangoda kwaMarange, vakaenda kwavari vachida kuvarambidza kunoita ongororo yavo ku Zimbabwe mwedzi yapfuura.
VaChikane vanoti vaimbova mukuru wemapurisa kuTshwane, VaMpho Mmutle, pamwe naVaAndrew Cranswich, mukuru we ACR, vaida kuti vasaende ku Zimbabwe vachiti nyaya iyi yaiva nemutauro.
ACR iri kumatare nehurumende pamusoro pekudzingwa kwayakaitwa kwaMarange nemauto muna 2006.
VaChikane vati vachazotaura pamusoro pegwaro ravo ravakaendesa kuKimberly Process svondo rinouya.
Asi gurukota remighodhi, VaObert Mpofu, vati Zimbabwe haisi kuzoramba isingatengesi mangoda ayo kunyange hazvo pane vamwe vari kuti mangoda ekwa Marange haana kuchena. Vati kune vazhinji vanosanganisira nyika dzakabudirira vasiri kuda kuti Zimbabwe ibudirire kuburikidza nemangoda ayo.
Vatizve Zimbabwe haina chayakapa VaChikane kuti vanyore gwaro rakabuda riine zvinhu zvinonakira Zimbabwe.
Va Mcdonald Lewanika ndivo vanoona nekufambiswa kwemabasa mu Crisis in Zimbabwe Coalition. Va Lewanika vanoti havanzwisisi kuti sei VaChikane vakamhanya kuti kupa kurudziro yekuti Zimbabwe inofanira kupihwa mvumo yekutengesa mangoda ayo zvinodiwa kuitwa zvisati zvapera kuitwa.
