Chikwata cheNgezi Platinum Stars chadimbura hutungamiri hweFC Platinum pamusoro pemakundano eCastle Lager Premier Soccer League.
Zvikwata izvi zvasiyana nemaponzi mana kubva pama poinzi matanhatu zvichitevera mafambiro akaita mitambo mukupera kwesvondo apo FC Platinum yakaita mangange, Ngezi Platinum Stars ichikunda mumutambo wayo.
Kugona Kunenge Kudada yakafamba muNational Sports Stadium muHarare ikatadza kubuda nemapoinzi ese matatu apo yakaita 1-1 neYadah musi mumwe chetewo Madamburo akadambura Triangle 3-1 mu Baobab Stadium mumutambo wakafadza murairidzi wavo Tonderai Ndiraya.
Zvakabuda mumitambo iyi zvasiya FC Platinum yave pamapoinzi makumi mana nemashanu, Ngezi Platinum Stars ichitevera nemapoinzi makumi mana nerimwechete. Zvikwata izvi zvese, zvatamba mitambo gumi nemipfumbamwe.
Asi zvikwata izvi hazvifanira kudziirirwa nehutungamiri hwazvo sezvo Chicken Inn isiri kuita zvekutamba mukuedza kuramba yakasonana navo.
Chikwata chaJoey Antipas ichi chakazvambura Nichrut 4-0 muLuveve Stadium izvo zvavapinza mumapoinzi makumi matatu nemana.
Kunyange hazvo vakasiiwa nemapoinzi gumi nerimwechete neFC Platinum, pachiri nemitambo yakawandisa kuti veruzhinji vafunge kuti maGame Cocks abuda mukurwira mukombe kana kuti vati mukombe uri kuenda kuMhondoro – Ngezi kana kuZvishavane.
Kune vamwe vakaita saVaLinoti Makwasha vanofunga kuti Chicken Inn ichashamisa vakawanda panopera mitambo yemwaka uno.
Asi peCaps United parikuratidza kuti papera apo chikwata chakatora mukombe uyu muna 2016 chatsvedza kubva pachinhanho chechina kusvika pachinzvimbo chechinomwe zvichitevera mangange e0-0 ayo yakaita neBulawayo Chiefs pamusha pavo muNational Sports Stadium.
Mimwe mitambo yaiveko yakapera seizvi……
Highlanders 1 Herentals 0
Shabanie Mine 2 Dynamos 2
ZPC Kariba 0 Black Rhinos 0
Bulawayo City 1 Harare City 1
Chapungu 3 Mutare City Rovers 1
Kwatambwa mitambo gumi nemipfumbamwe zvikwata zvina zviri pamusoro soro ndeizvi….
FC Platinum 45 points
Ngezi Platinum Stars 44 points
Chicken Inn 34 points
Triangle 32 points
Zvikwata zvina zviri pasi pasi ndeizvi….
Nichrut 16 points
Bulawayo City 15 points
Shabanie Mine 15 points
Mutare City Rovers 11 points
Facebook Forum