Mumwe muzvinabhizinesi ane mukurumbira pasi rose, Va Richard Branson, neChipiri vakaparura hurongwa hutsva hwekuyedza kubatsira kumutsiridza Zimbabwe munyaya dzedzidzo, mabhizimisi nezvimwe zvakadaro.
Va Branson, mukuru we Virgin Group, vari kushanda nesangano re Clinton Global Initiative, Nduna Foundation ne Humanity United muhurongwa hunodaidzwa kunzi Zimbabwe Enterprise mukubatsira kumutsiridza Zimbabwe.
Ivo Va Branson nezuro vakakurudzira vane mari kuti vaende kunotanga mabhizimisi muZimbabwe kuitira kuti nyika iwane pundutso.
Hatina kukwanisa kubata Muzvare Isabella Matambanadzo vanova chief executive ve Enterprise Zimbabwe.
Mutungamiri we Affirmative Action Group, Va Supa Mandiwanzira, vanoti zvakanaka kuti vanhu vane mari vauye kuzotanga mabhizimisi munyika asi vachiziva kuti vanofanira kushanda nezvizvarwa zve Zimbabwe.
