Musangano wekutsvaga nzvimbo dzichaitirwa misangano yekunzwa pfungwa dzevanhu pakunyorwa kwebumbiro idzva remitemo muHarare, hauna kufamba zvakanaka, uye hauna chawaburitsa. Zvinonzi Zanu PF yaramba yakaomesa musoro ichiti inoda kuti paitwe musangano mumwe chete pawadhi yega yega, izvo zvarambawo kutambirwa nemamwe mapato.
Imwe nhengo yeMDC inotungamirwa naVaKurauone Chihwayi, vati nhengo dzeZanu PF dzauya dzikavhiringidza hurongwa hwavo. Studio7 haina kukwanisa kunzwa kudivi reZanu PF panyaya iyi.
Ukuwo vagari vemuBulawayo vanoti havasi kufara nemashambidzirwo ari kuitwa misangano yemuBulawayo nemuHarare. Vanoona nezvezvirongwa zvesangano reNational Youth Development Trust, VaMmeli Dube, vanoti kunyange hazvo Copac yaburitsa nzvimbo dzichaitirwa misangano mumapepanhau, havasi vose vanoverenga mapepa aya.