Mutungamiri we MDC Alliance, VaNelson Chamisa, vavimbisa vanhu veku Hwedza kuMashonaland East kuti kana vakasarudzwa semutungamiri wenyika, vachasimudzira dunhu reHwedza kuitira kuti vagari vemudunhu iri vasatambudzike sezvavari kuita pari zvino.
Vachitaura kuvanhu vakawanda vaungana kumaruwa ekuHwedza, VaChamisa vatora mukana uyu kutenda mutungamiri wenyika, Va Emmerson Mnangagwa, pamwe nemutevedzeri wavo, Va Constantino Chiwenga, nebasa guru ravakaita mukurwira rusununguko rwenyika.
Asi VaChamisa vaudza vaviri ava kuti vachisiira matomu kune vechidiki vanokwanisa kugadzirisa hupfumi hwenyika.
VaChamisa vaudzawo vagari vekuHwedza kuti hurumende yavo ichagadzirisa nyaya dzemari kuitira kuti munyika musashandiswe ma bond notes.
VaChamisa, avo vanogara vakataura nyaya yemigwagwa vachiti ichagadzirwa kuita kunge spaghetti, vatiwo vachasimbaradza nyaya dzekurima kumaruwa kuitira kuti vanhu vave nehupenyu hwakanaka. Vati hurumende yavo ichawanisa varimi vese matarakita kuitira kuti vasashandise mombe pakurima.
VaChamisa, avo vari pamakakatanwa nemutungamiri9 weimwe MDC-T, Muzvare Thokozani Khupe, panyaya yekuti ndiyani chaiye mutungamiri weMDC-T zvichitevera kushaya kwevaimbove mutungamiri weMDC, Va Morgan Tsvangirai muna Kukadzi gore rino, vatora mukana wemusangano wekuHwedza uyu kuudza madzimai kuti hurumende yavo ichasimudzira hupenyu hwevanhukadzi sezvo vari musimboti wenyika.
VaChamisa vapedza kutaura vachivimbisa vanhu vekuHwedza kuti hurumende yavo ichagadzirisa zvipatara nemakiriniki kuitira kuti vanhu varapwe nyore.
Dunhu reMashonaland East rinoziivakanwa zvikuru nekuvhotera Zanu PF munguva dzesarudzo.
Musarudzo yemutungamiri yakaitwa muna 2013, VaRobert Mugabe veZanu PF vakawana mavhoti 320,719, ukuwo VaMorgan Tsvangirai veMDC vakawana mavhoti 90,165.
Nyanzvi munyaya dzematongerwo enyika dzinoti MDC Alliance inofanirwa kushanda zvakasimba kuti ikunde VaMnangagwa veZanu PF musarudzo yemutungamiri wenyika.
Facebook Forum