Accessibility links

Breaking News

Maonero eHurumende yeAmerica

Mushandira Pamwe weMokeng neAmerica

US QATAR

Musi wa Gunyana 11, America, Cambodia, Laos, Myanmar, Thailand, Vietnam, nesangano re ASEAN dzakaumba mushandirapamwe weMekong neAmerica, kana kuti Mekong-U.S. Partnership.

Mushandirapamwe uyu unoratidza kukosha kwedunhu reMekong kuAmerica uye kuwedzera kushanda pamwe kwakatanga muna 2009 pasi pechirongwa che Lower Mekong initiative.

“Tichavaka tichitevera basa rakanaka re Lower Mekong Initiative nemabhiriyoni matatu nemamiriyoni mashanu emadhora ($3.5 billion)yemari yekubatsira dunhu yakabva kuAmerica mumakore gumi nerimwe adarika,” vakadaro gurukota rezvekudyidzana nedzimwe nyika muAmerica, VaMike Pompeo mumashoko avo.

Pamusangano wekuparurwa kwemushandirapamwe weMekong neAmerica weMekong-U.S. Partnership, America yakazivisa nezvemari inodarika mamiriyoni zana nemakumi mashanu emadhora, kana kuti $150 million yekubatsira dunhu reMekong.

Pamari iyi, mamiryoni makumi mashanu nemaviri emadhora kana kuti $52 million ndeyekutsigira chirongwa chekupona kubva kuCOVID-19, mamiriyoni makumi mashanu nemashanu emadhora kana kuti $55 million inenge iri yekurwisana nemhosva dzinodarika miganho yenyika dzakasiyanasiyana, mamiriyoni makumimatatu nematatu emadhora kana kuti $33 million, ichabatsira kusimudzira misika yemhando dzemoto, uye mamiriyoni maviri emadhora kana kuti $2 million, ichabatsira mukurwisana nekufambiswa kwevanhu zviri kunze kwemutemo.

Mushandirapamwe weMekong neAmerica wakazvipira mukuzvitonga, kusununguka kwehupfumi, hutongo hwejekerere, nekukura kunochengetedzeka kwenyika dziri mugungano iri.

“Tatsigira kukura kwehupfumi nemari inodarika bhiriyoni imwe chete yekugadzira zvivakwa munyika dziri pasi pedunhu re ASEAN kuburikidza neU.S. International Development Finance Corporation (DFC), nehurongwa hwekudyara mamwe mabhiriyoni mumakore anotevera,” vakadaro VaPompeo.

Vakayambira zvakadaro nezvechidikwadikwa chekutarisana nematambudziko akatarisanwa nawo, “kusanganisira ayo anobva kubato reChinese Communist Party (CCP), iro rinoramba richitysidzira zviwanikwa nekusununguka kwehupfumi mudunhu reMekong.”

Matanho eCCP ekuita zano ndega pakuvhara mvura kumusoro awedzerawo dambudziko rekushaikwa kwemvura kwemakore. America inomira nedunhu iri pamwe nekomisheni inoona nezvemvura yemuna rwizi Mekong, reMekong River Commission mukukurudzira kuti ruzivo rwunenge rwaunganidzwa rwugovanwe zviri pachena.

“Tinokurudzira nyika dziri mudunhu reMekong dzimanikidze CCP kuti imire nemhiko yayo yekuvimbisa kuzivisa ruzivo rwainenge yaunganidza rwakanangana nemvura. Ruzivo irworwo rwunofanirwa kuve pachena rwuchionekwa nevanhu vose. Rwunofanirwa kuburityswa gore rose,” vakapika vachidaro VaPompeo. “Uye rwunofanirwa kugovanwa kuburikidza nekomisheni yeMekong River Commission, sangano rinotungamidza zvido zvenyika dziri mudunhu reMekong, kwete zve Beijing.”

America iri kushushikana zvakare nezvekwereti zvine chewkuita nezvivakwa uye kuhwandira nekusajeka kwenzira dzemabhizimusi emakambani ehurumende ye Beijing, akaita seChina Communications Construction Company. Imwe nyunyuto ndeyekukwira kwekufambiswa kwevanhu zvisiri pamutemo, zvinodhaka, nemhuka dzesango, zvizhinji zvacho zvichibva kumasangano, makambani, nenzvimbo dzine mitemo yakasiyana nedzimwe dzemunyika, kana kuti special economic zones dzinodyidzana neCCP.

Kuburikidza nemushandirapamwe weMekong neAmerica, America inotarisira kudzivirira zvido zveshamwari dzayo nekubatana kuitira runyararo, kugadzikana nebudiriro mudunhu reMekong.

please wait

No media source currently available

0:00 0:04:23 0:00
Pekupinda Napo Kuti Muone Zvamuri Kuda


See all News Updates of the Day

Russia Yoenderera Mberi Ichimbunyikidza Kodzero dzeZvitendero

please wait

No media source currently available

0:00 0:03:25 0:00
Pekupinda Napo Kuti Muone Zvamuri Kuda

Russia Yoenderera Mberi Ichimbunyikidza Kodzero dzeZvitendero

Russian President Vladimir Putin chairs a meeting with government members via a video conference call at Novo-Ogaryovo state residence outside Moscow, Russia, Feb. 10, 2021.

Russia iri kuenderera mberi nekumbunyikidza kusununguka kwezvitendero, zvikuru ichinangana nezvitenderi zvidiki nemasangano madiki.

Kereke yeJehova’s Witness iri kumbunyikidzwa nevakuru vakuru muRussia.

Munguva pfupi yapfuura, dare remuRussia rakatongera nhengo yechechi iyi, Aleksandr Ivshin, kupika mujeri kwemakore manomwe nechidimbu achipomerwa mhosva yekuva mutenderi wekereke iyi.

Mutongo uyu wakaomarara zvikuru, zvichitevera mutongo wedare repamusoro soro muna 2017, uyo wakabhana chechi yeJehova’s Witness, uchiti chitendero ichi chinoita zvakapfurikidza mwero.

Kupfurikidza mwero kunonzi kwakaitwa naIvshin, kunosanganisira kuronga zvidzidzo zvebhaibheri padandemutande nevamwe vake vechitendero ichi.

Musi wa Kukadzi 10, mapurisa emuMoscow nematunhu akakomberedza guta iri akapinda zvichisimba mudzimba gumi neshanu dzenhengo dzeJehova’s Witness, akadzisunga nekudzichengetedza achibvunzurudza vatenderi ava.

Vatatu vavo vachiri muhusungwa kubva musi uyu. Musi iwoyo, dare remudunhu reKursk rakaramba kukurumidza kuburitsa mujeri nhengo yekereke iyi iri kupika kwemakore matanhatu kubva muna 2017.

Aya maitiro enyika iyi, ayo ari kuramba achienderera mberi muRussia.

Sekuziva kwekomisheni yemu America inoona nezvekusununguka kwezvitendero pasi rose, hurumende yeRussia muna 2019, yakaramba yakanangana nezvitendero zvidiki ichizvibhadharisa mafaindi, kuchengetedza nhengo dzinenge dzabatwa, ichipomera vanhu ava mhosva dzekuita “zvinopfurikidza mwero.”

Imhosva muRussia kuita “zvinopfurikidza” mwero, kunyange hazvo pasina tsanangudzo yakajeka pamaparirwo emhosva iyi, izvo zvinopa hurumende yeRussia kuita madiro ajojina mukusunga vanhu vanenge vasingaite mhirizhonga vachiita zvinodiwa nezvitendero zvavo.

Mamiriro ezvinhu akanyanya kuipa gore rapera, sekubuda kuri kuita zviri kuitika kubva kumasangano akazvimirira.

Mapurisa emuRussia anonzi akapinda zvechisimba mudzimba dzevanhu dzinodarika chiuru nemazana maviri nemakumi mapfumbamwe nenhanhatu, uye akapomera mhosva vanhu zana nemakumi mapfumbamwe nevanomwe, kubva pavanhu mazana mana nemakumi matatu nevashanu veJehova’s Witness, nhengo dzechechi iyi makumi mana nembiri dziri mujeri pari zvino, uye makumi maviri nevanomwe havasi kubvumidzwa kubva padzimba dzavo.

Midziyo yechechi iyi yakabvutwa nehurumende, vatenderi vari pakati pe zviuru zvishanu nezviuru gumi vanofungidzirwa kuti vakatiza nuRussia kubva muna 2017, vachitya kumbunyikidzwa.

“America inoshora zvakadzama zviri kuitwa neRussia mukusunga vanhu vechitendero cheJehova’s Witness pamwe nezvimwe zvitendero,” anodaro mutauriri webazi rezvekudyidzana kweAmerica nedzimwe nyika, Ned Price achiwedzera zvakare achiti:

“America inokomekedza kuti panyaya dzekodzero dzevanhu, munhu wese ane ruramo yekutambira kana kusatambira zvinhu semaonero ake akasununguka.”

please wait

No media source currently available

0:00 0:03:25 0:00
Pekupinda Napo Kuti Muone Zvamuri Kuda


America Inoti Inokoshesa Chibvumirano cheParis Agreement

VaJoe Biden nemudzimai wavo Amai Jill Biden

Mune chimwe chiitiko chavo chekutanga mushure mekutora mhiko yekutungamira nyika yeAmerica VaJoe Biden vakazivisa kuti America yainge yodzokera muchibvumirano chekukurudzira nyika dzepasi rino kuti dzichengetedze mweya wekufema nemamiriro ekunze chePARIS Agreement.

Chibvumirano ichi chakanyoreranwa muna Zvita 2015 asi chakatanga kushanda muna 2016. Sangano reUnited Nations richinyoresa nyika zana nemakumi mapfumbamwe dzichipinda muchibvumirano ichi muna 2021.

Chinangwe chechibvumirano ichi chakanangana nekuona kuti nyika dzose dzatevedzera zvakatenderana mukuchengetedza zviwanikwa uye kuona kuti mumaindastiri hamusi kushandiswa zvakawanda zvinosvibisa mweya wekufema.

Izvi zvikasaitwa zvinogona kukonzera mafashamu emvura, kusanaya kwemvura uye madutumupengo emhepo uye kudzikisawo kupisisa kwepasi rino pamwe nemoto inongotanga mumasango ichinetsa kumisa.

Kusagadzirawo nyaya iyi kunoreva kuti magungwa anotanga kuzarisa mvura rinogona zvekare kuva dambudziko kuvanhu.

VaBiden vakabuda pachena kuti kuchengetedza mamiriro ekunze chimwe chinhu chikuru chinokosheswa nehurumende yavo.

Pavaitsvaga rutsigiro rwekutungamira nyika yeAmerica gore rapera, VaBiden vakavimbisa kuti vakasarudzwa vanozodzosera America muchibvumirano cheParis Agreement ichi.

Pavaitora mhiko yekutungamira nyika musi wa 20 Ndira VaBiden vakatiwo pasi riri kuchema nekuda kwekubatwa kuri kuitwa zviwanikwa nemweya unofemwa nevanhu.

Mutauriri wemuzinda wemutungamiri wenyika yeAmerica weWhite House Amai Jen Psaki vanoti mukudzokera muchibvumirano ichi, VaBiden vari kuratidza kukoshesawo kwavanoita kudyidzana nedzimwe nyika dzepasi rino uye kuda kudzosera America mumatare anozeya nyaya dzakakosha pasi rose.

Izvi vanoti zvakaratidzwawo nekudzokera kweAmerica musangano rinoona nezvehutano pasi rose reWorld Health Organization, mumwe munongedzo wekuti VaBiden vanokoshesa kudyidzana nedzimwe nyika mukugadzirisa matambudziko akatarisana nevanhu vepasi rose.

VaBiden vakadomawo vaimbova gurukota rezvekudyidzana nedzimwe nyika VaJohn Kerry kuti vave chipangamazano chavo munyaya dzezvekuchengetedzwa kwezviwanikwa nemamiriro ekunze. Aka ndekekutanga munhoroondo yeAmerica pachidomwa munhu pachigaro ichi.

Nyika dzakawanda dziri kutambira America nekudzoka kwayaita muchibvumirano cheParis Agreement ichi kusanganisirawo mutungamiri wenyika yeFrance VaEmmanuel Macron vakati zvakakosha kuti nyika dzepasi rose dziite mushandirapamwe mukuchengetedza mamiriro ekunze nezviwanikwa.

Aya mashoko anotaura pamire hurumende yeAmerica.

Mashoko Anotaura Pamire Hurumende yeAmerica
please wait

No media source currently available

0:00 0:02:57 0:00
Pekupinda Napo Kuti Muone Zvamuri Kuda


Maonero eHurumende yeAmerica

please wait

No media source currently available

0:00 0:03:01 0:00
Pekupinda Napo Kuti Muone Zvamuri Kuda

Mashoko Anoziviswa Pasi Rose neHurumende yeAmerica

Homwe yemubayiro unopihwa nebazi reAmerica rinodyidzana nedzimwe nyika, yeRewards for Justice program, iri kupa mari inosvika mamiriyoni mashanu emadhora ekuAmerica kumunhu ane mashoko anoita kuti Mir nevamwe vose vakaita kuti Mumbai ibhomnbwe, asungwe nekuendeswa kujeri.

Musi waMbudzi 26, 2008, varume gumi vaive nepfuti, uye vachidyidzana nechikwata chemagandanga anopfurikidza mwero, icho chiri muPakistan, cheLashkar-e-Tayyiba, chakarwisa nzvimbo dzakawanda muMumbai kuIndia.

Chikwata ichi chakarwisa nzvimbo dzaishanyirwa zvakanyanya nevashanyi, chiteshi chezvitima, pamwe nemuzinda unoshandiswa nevanhu vechitendero chechi Jewish.

Kurwisa uku kwakaitika kwemazuva akawanda, uye vanhu zana nemakumi matanhatu nevatanhatu, vaibva munyika dzakasiyana siyana gumi nenomwe, vakafa, kusanganisira varwisi vacho vapfumbamwe, uye vanhu vanodarika mazana matatu vakakuvara muchiitiko ichi.

Murwisi akapona muchiitiko ichi, akaurayiwa zviri pamutemo muna Mbudzi 2012, asi Sajid Mir, murume akaronga zvose kuitira kuti kurwisa uku kubudirire, haasati asungwa kusvika pari zvino.

Mir akapomerwa mhosva nedare repamusoro remuIllinois muAmerica musi was Kubvumbi 21, 2011. Dare iri rakaburitsa magwaro ekuti Mir asungwe zuva rakatevera.

Mir akapomerwa mhosva yekuronga kuparadza zvinhu munyika isiri yake; kubatsira nezvikwanisiro vanoita zvakapfurikidza mwero, kubatsira mukuurayiwa kwechizvarwa cheAmerica chaive kunze kweAmerica; kubhomba nzvimbo dzinoshandiswa neveruzhinji.

Muna 2019, Mir akaiswa pamazita emagandanga ari kutsvagwa zvakanyanya nebazi rematikitivha muAmerica.

Homwe yemubayiro unopihwa nebazi reAmerica rinodyidzana nedzimwe nyika, yeRewards for Justice program, iri kupa mari inosvika mamiriyoni mashanu emadhora ekuAmerica kumunhu ane mashoko anoita kuti Mir nevamwe vose vakaita kuti Mumbai ibhomnbwe, asungwe nekuendeswa kujeri.

Sajid Mir akaberekwa muna 1976 kana 1978 mu Lahore, Pakistan. Akareba zviri pakati pemasendimita zana nemakumi matanhatu nemashanu kusvika pazana nemakumi matanhatu nemanomwe, uye anorema makirogiramu makumi matanhatu.

Semaziviro eFBI, Mir ane chiso chine vanga pashaya yekuruboshwe, uye vanga pamusoro peziso rake rekurudyi.

Ani nani zvake ane ruzivo rwekuna Sajid Mir anofanirwa kutumira mashoko kuRewards for Justice achishandisa Whatsapp, Telegram, kana Signal panhamba dzinoti + 1 202 702 7843.

Zvose zvinotambirwa neRewards for Justice hazviburitswe pachena.

Ichi chiziviso chiri kutumirwa pasi rose nehurumende yeAmerica.

please wait

No media source currently available

0:00 0:03:01 0:00
Pekupinda Napo Kuti Muone Zvamuri Kuda


Rodhai zvimwe

XS
SM
MD
LG