Sangano reEuropean Union, EU, rinoti rakazvipira kushanda nehurumende yeZimbabwe, VaRobert Mugabe, vari mutungamiri wenyika, uye VaMorgan Tsvangirai vari mutungamiri wehurumende.
Vachitaura pamusangano wezvibvumirano munyaya dzehupfumi, kana kuti Economic Partnership Agreements muHarare, mumiriri weEU muZimbabwe, VaXavier Marchal, varamba mashoko ekuti sangano ravo riri kutungamira kushandurwa kwehurumende muZimbabwe. Vati chakaitwa nesangano ravo kuisa zvisungo zvinofanirwa kutevedzwa kudzamara Zimbabwe yava kuremekedza kodzero dzevanhu.
Mashoko aVa Marchal aya anouya apo VaMugabe nebato ravo vari kupomera EU nenyika dzekumawirira mhosva yekutemera Zimbabwe zvirango.
Vanoongorora zvematongerwo enyika, uye vachitungamira sangano reCentre for Community Development in Zimbabwe, VaPhilip Pasirayi, vanoti EU yagara ichida kuti Zimbabwe iremekedze kodzero dzevanhu.
