Dare repamusoro reHigh Court rakapa mutongo wekuti Muzvare Jestina Mukoko vapihwe mari inosvika zviuru zana nemakumi mashanu zvemadhora semuripo wekupambwa nekushungurudzwa kwavakaitwa vari muhusungwa.
Pamari iyi, Muzvare Mukoko vachapihwa mari inosvika chiuru zana imwe inosvika zviuru makumi mashanu ichienda kumagweta avo anove nhengo dzesangano reZimbabwe Lawyers for Human Rights.
Hurumende nemagweta aMuzvare Mukoko akawirirana pamari iyi pamberi pedare. Dare iri rati mari iyi ibhadharwe musi wa31 Gumiguru usati wadarika. Muzvare Mukoko vakapambwa kumba kwavo kuNorton musi wa3 Zvita 2008 vakazoendeswa kumatare musi wa24 Zvita.
Vaipomerwa mhosva yekuda kupidigura hurumende yevaive mutungamiri wenyika VaRobert Mugabe.
Dare reSupreme Court rakambotara kuti vose vainge vapamba Muzvare Mukoko vaigona kuendeswa kumatare ivo pauzima.
Muzvare Mukoko vati kuripwa uku hakubvise bundu riri mumoyo mavo asi zvichabatsira vamwe vanotyorerwa kodzero kuti vazive kuti kwekupotera kuripo.
Facebook Forum