Paramende yemuAmerica yatanga kuzeya bhiri remutemo mutsva wekudyidzana neZimbabwe unonzi Zimbabwe Renewal Bill of 2010, uye kana watambirwa uchange wonzi Zimbabwe Renewal Act of 2010.
Nhengo yedare reCongress, VaDonald Payne, vachitsigirwa nevamwe vavo vanodarika makumi matatu nevashanu, ndivo vari kutungamira muhurongwa hwekuti bhiri remutemo uyu ritambirwe nedare. Mutemo uyu une chinangwa chekuvandudza mutemo unorambidza America kudyidzana neZimbabwe.
America yakatemera Zimbabwe zvirango muna 2001 pasi pemutemo weZimbabwe Democracy and Economic Recovery Aact, kana kuti ZIDERA.
Mutungamiri wenyika, VaRobert Mugabe, nevamwe vavo mazana maviri vakatemerwa zvirango kuburikidza nemutemo weZIDERA nenyaya yekutyora kodzero dzevanhu kwavanoita.
ASi bhiri remutemo weZimbabwe Renewal Bill rinopa mukana wekuti paumbwe sangano rinenge richiongorora nyaya dzekodzero dzevanhu muZimbabwe, uye kutsigira nyaya dzehutano, dzidzo nekurima.
Bhiri iri rikava mutemo, America ichabatsira kuti Zimbabwe ikanganwirwe chikwereti chayo. Asi vanoramba vachityora kodzero dzevanhu muZimbabwe, vacharamba vakatemerwa zvirango.
VaBriggs Bomba vanoshanda saCamapigns Director weAfrica Action, rimwe remasangano ari kushanda kuti mutemo uyu upasiswe. VaBomba vanoti mutemo uyu ukatambirwa unenge wakakosha zvikuru.
