Chikwata chemadzimai cheZimbabwe Cricket nezuro chakarova Namibia nemaranzi makumi mashanu ndokubudirira kuenda kuScotland uko chichanotamba makwikwi ekugumisira chakamirira Africa emunzira yekuenda kuWorld Cup yemaT20.
Vashanyi ava vakakwanisa kusvitsa maranzi makumi matanhatu nemana izvo zvasiya muteveri wemaChevrons VaKudzai Bere vari mumafaro nekukunda kwemaLady Chevrons.
Mumutambo wanezuro, Sharne Mayers naChipo Mugeri-Tiripano vakamuka chibhebhenenga ndokukanda maranzi makumi matatu nematanhatu pamunhu ndokubatsira Zimbabwe kusvika pamaranzi zana negumi nemana ayo Namibia yakatadza kudarika.
Zimbabwe yakabuda mumakwikwi emuAfrica aya isina kukundwa kana mutambo mumwechete mushure mekudambura Mozambique, Rwanda, Zambia, Nigeria, neNamibia.
Muongongorori wemitambo VaFarai Kambamura vanoti varikuona Zimbabwe ichinopunza zvikwata zvepamusoro soro apo iri kuenda kuScotland.
KuScotland, Zimbabwe ichanosangana neScotland yacho, Bangladesh, Thailand, Papua New Guinea, nezvimwe zvikwata zviviri zvichabva kuEurope nekuAmerica ichitarisira kubudirira kuenda kuWorld Cup.
Panguva ino, Zimbabwe irikuenda kuNorway nekuIreland kunogadzirira makundano ekuScotland sezvo Norway neIreland dziine mamiriro ekunze akafanana neekuScotland.
Castle Premier Soccer League
Zvichakadaro, chikwata chemaGreen Machine cheCaps United chatora hutungamiri hweCastle Lager Premier Soccer League mushure mekushanya kuGibbo Stadium nekurova Triangle 2-1.
Makepekepe yave nemapoinzi gumi nematanhatu, mapoinzi maviri pamusoro peFC Platinum iyo yakadamburwa 1-0 neTelOne.
Asi Makepekepe irikuvhunduka kuuya kuri kuita Dynamos iyo yakatora mamwe mapoinzi matatu yarova Yadah 1-0 muRufaro Stadium nezuro.
Uyu wave mutambo wechitatu Dynamos ichingotora mapoinzi kubvira Tonderai Ndiraya atora hurairidzi kubva kuna Lloyd Chigove.
Ndiraya arikufara nemafambiro arikuita zvinhu panguva iyo Madinda Ndlovu weHighlanders akasiya basa neMugovera mushure mekunge chikwata chake chakarohwa 3-0 pamusha neChicken Inn.
Highlanders yave pachidanho chechipiri kubva pasi pasi pegungano iri nemapoinzi mana chete kubva mumitambo minomwe.
Mitambo yese yakapera seizvi …..
Chicken Inn 3 Highlanders 0
TelOne 1 FC Platinum 0
Yadah 0 Dynamos 1
Triangle 1 Caps United 2
Herentals 0 Manica Diamonds 1
Hwange 0 Chapungu 1
Harare City 0 Bulawayo Chiefs 0
ZPC Kariba 1 Ngezi Platinum 0
Mushowani Stars 2 Black Rhinos 0
English Premier League
Mune imwewo nyaya, Makundano eEnglish Premier League akasvika kumagumo nezuro apo chikwata cheMancheter City chakatora mukombe kwemakore maviri akateverana.
MaCitizens akapedza aiine mapoini makumi mapfumbamwe nemasere, poindi imwechete pamusoro peLiverool.
Izvi zvinotevera kurova kwavakaita Brighton 4-1 musi mumwechete Liverpool yakakunda Wolves 2-0.
Chelsea neTottenham ndidzo dzakapedza dzichitevera Man City neLiverpool uyezve dzichatamba muChampions League gore rinouya.
Facebook Forum