Mutauriri webato re MDC-T, Amai Linda Masarira-Kaingira, nezuro vakadzingwa mubato iri vachipomerwa mhosva yekupfeka Zambia rekumonera rebato reZanu-PF.
Sachigaro webato iri, VaAbednico Bhebhe, vanoti bumbiro remutemo webato ravo unoti hapana anofanirwa kupfeka mbatya dzerimwe bato.
Amai Masarira-Kaingira vaudza Studio 7 kuti vakatumirwa tsambambozha yavakazoona nezuro manheru vasvika muHarare kubva kumusha kwavange vaenda.
Vanoti zvinovashamisa kuti Muzvare Thokozani Khupe havana kuvatsigira sekutsigira kwavakambovaita pavaishorwa mushure mekutsvodwa kwavakaitwa padama nemutungamiriri wenyika, VaEmmerson Mnangagwa apo vaitoreswa mhiko yekutungamira nyika.
Amai Masarira-Kaingira vati havana bato ravanoda kushanda naro asi vacharamba vachishandira nyika yavo sezvavagara vachiita vasati vapinda muMDC-T.
Hatina kukwanisa kubata Doctor Khupe kuti tinzwe divi ravo panyaya iyi.
Facebook Forum