Mutambo waCharles Manyuchi wekugumisira uyezve wekupemberera nhoroondo yake yetsiva uyo wanga uchifanirwa kuitwa manheru emugovera wambomiswa.
Mutambo uyu washaya nhandare yekutambirwa mushure mekunge Harare International Conference Centre iyo yanga ichida kushandiswa yatorwa nevamwe avo vaive vatobhadhara mari yavo kare.
Anoronga mitambo yaManyuchi muzvare Monica Cheru vanoti vave kutsvaga rimwe zuva mwedzi unotevera kuti mutambo uyu uitwe uyezve uchiperekedzwa nemimwe mitambo.
Muzvare Cheru vanoti Manyuchi uyo akatora mabhande ehuremu wemiddleweight reWorld Boxing Council, World Boxing Federation neAfrica Boxing Union arikusvika pamagumo erwendo rwake rwetsiva nemutambo uyu.
“Charles asvitsa makore makumi matatu uyezve mushure mekutora mabhande gumi nematatu, anoti pake pakwana saka ave kupawo mukana kune vechidiki,”muzvare Cheru vanotsinhira.
Mutambi uyu arikufanira kurwa naSheriff Kasongo wekuDRC obva akanda magirovhosi ake musango.
Asi mitambo yeCastle Lager Premier Soccer yaenderera mberi nhasi masikati apo yapinda musvondo yegumi nerimwechete.
Chikwata chine mukombe uyu FC Platinum yaswedera pedyo nekutora hutungamiri mushure mekurova Black Rhinos 1-0 nechibodzwa chaWalter Musona.
FC Platinum yave pachinzvimbo chechipiri kubva pachinhanho chechisere yapinda mumapoinzi gumi nemasere.
FC Platinum yaenzana mapoinzi neHighlanders iyo irikutungamira gungano iri asi Bosso inowedzera hutungamiri hwayo kana ikarova Greenfuel mumutambo wayo muBarbourfields Stadium mangwana.
Mune mumwe mutambo wanhasi Bulawayo Chiefs yaita mangange 1-1 neCranbourne Bullets asi yakwira kuenda pachinhanho chechina pamusoro peManica Diamonds iyo yarohwa 1-0 neYadah.
Bulawayo Chiefs ine mapoinzi gumi nemanomwe, Manica Diamonds iine mapoinzi gumi nematanhatu.
Facebook Forum