Chikwata chine mukombe weCastle Lager Premier Soccer League, cheFC Platinum, chambozorora kurohwarohwa mushure mekukundawo mumutambo wacho neMugovera masikati.
Chikwata ichi charova ZPC Kariba 1-0 ndokupawo vatsigiri vacho nguva yekufara mushure mekusuwa kwenguva yakati rebeyi.
FC Platinum yanga isati yakunda mumitambo mitatu yakateverana kusvikira nhasi apo yatorawo mapoinzi ese matatu kubva kuvashanyi veZPC Kariba ava.
Chibodzwa chaWalter Musona chapinza FC Platinum mumapoinzi gumi nemashanu kubva mumitambo gumi.
Murairidzi we “Kugona Kunenge Kudada,” Norman Mapeza, anoti makundano aya irwendo urwo vari kutarisira kuzopedzisa nemufaro.
Asi mutsigiri weZPC Kariba, VaLuckson Tobias, vanoti rwendo rwavo kurwisana nekuchengetedza nzvimbo yavo mugungano rePSL.
Asi mapoinzi matatu avatora nhasi haasi kukwanisa kuendesa FC Platinum pamusoro petafura, asi kuvasvitsa pachinzvimbo chechitanhatu mugungano rezvikwata gumi nezvisere iri.
Chikwata cheNgezi Platinum Stars ndicho chichiri panyanga kunyange hazvo chadamburwa 2-0 neChicken Inn nhasi masikati zvekare.
Kunyange zvafamba zvakadai, murairidzi weNgezi Platinum Stars, Takesure Chiragwi, anoti aya makwikwi zvekuti vanofanira kudhonza gejo zvakasimba kuti vazowanawo mugowo unofadza.
Highlanders, iyo yanga ichifanira kuenda pamusoro petafura nekukunda zvichitevera kurohwa kweNgezi Platinum, yaita mangange 1-1 neCranboune Bullets muNational Sports Stadium.
Ngezi neHighlanders dzakaenzana pamapoinzi gumi nemanomwe asi Ngezi iri pamusoro nezvibodzwa.
Mune mumwe mutambo watambwa neMugovera, Greenfuel yarova Black Rhinos 1-0.
Mimwe mitambo mugungano iri iriko neSvondo yakamira seizvi..
Dynamos v Manica Diamonds - NSS
Hwange v Triangle - Colliery.
Mutambo pakati peSheasham neCaps United wamira netambo mushure mekunge Sheasham yaramba kunotambira mutambo uyu muMandava Stadium sezvakatarwa nePSL vachiti vari kuda kushandisa nhandare yavo yeBata.
Nhandare yeBata iyi yakapihwa mvumo nekomiti yeZifa, yeFirst Instance Body, iyo inoona nezvedzinhandare asi vatungamiri VePSL vakamisa kushandiswa kwayo, izvo veSheasham vari kupokana nazvo.
Kunyange hazvo anotaura akamirira Sheasham, VaElias Maginy,a varamba kutaura nezvenyaya iyi, vanoziva zviri kuitika vanoti chikwata ichi hachisi kuenda kunotamba kuZvishavane neSvondo.
Facebook Forum