Gurukota rinoona nezvemitambo Muzvare Kirtsy Coventry vapihwa mazuva mashanu ekuti vakumbire ruregerero pamashoko avanonzi vakaudza dare reparamende ekuti bhodhi reZifa rakadzingwa basa neSports and Recreation Commission harina kushandisa zvakanaka mari inosvika mamiriyoni maviri kubva kuhurumende.
Vaive mubati wehomwe webhodhi iri VaPhilemon Machana vaudza vatori venhau muHarare nhasi kuti vanoti vanyorera Muzvare Coventry kuti vavachenure panyaya iyi kana kuti voendeswa kumatare.
VaMachana vanoti vari kukumbira kuti nyaya yemari iyi imhan’arwe kumapurisa.
Hatina kukwanisa kubata Muzvare Coventry kuti tinzwe kuti tinzwe divi ravo sezvo sezvo nharembozha yavo yange isiri kudairwa.
Bhodhi iri iro raitungamirwa naVaFelton Kamambo rakadzingwa basa neSports and Recreation Commission richipomerwa mhosva dzehuwori kusanganisira kusashandisa nemazvo $2 mirioni iyi kumakundano eAfcon 2019.
Asi VaKamambo vanoti rave gore nemwedzi mitanhatu kubvira vadzingwa basa nenyaya yeUS$2 mirioni iyi asi nanhasi hapana magwaro ari kubuditswa kuti mari iyi yakapihwa Zifa rinhi uyezve ichiiswa mubhanga ravo ripi.
Vanoti mari iyi kana yakabuda muhomwe yebazi rezvemitambo iro mazuva acho raitungamirwa naVaKazembe Kazembe haina kusvika kwavari.
VaMachana vanoti mari yavanoziva yavakatambidzwa nehurumende madhora zviuru makumi mashanu nezvitatu ekuAmereka iyo vane magwaro kuti vakashandisa sei
Vanoti vazivisa mutauriri weparamende VaJacob Mudenda kuti gurukota rezvemitambo Muzvare Kirsty Coventry vakanyepera paramende nenyika apo vakati bhodhi raVaKamambo harina kushandisa nemazvo $2 million yakabva kuhurumende.
Kudzingwa kwebhodhi raVaKamambo kwakakonzera kuti Zimbabwe idzingwe munhabvu yepasi rese neFifa iyo isingatendere hurumende kana mapazi ayo kupindira mune zvehutungamiri hwenhabvu.
Vamwe vatambi vakaita saMarshall Munetsi anotambira Rems kuFrance vari kukurudzira SRC kuti idzore VaKamambo kuti Zimbabwe itenderwe kutamba nhabvu nedzimwe nyika. Makwikwi eAfcon 2023 akatotanga pasina Zimbabwe sezvo SRC iri kuramba yakatsika madziro ichiti haidi kudzosa VaKamambo pabasa.
Mukuru weZimbabwe National Soccer Supporters Association VaJoseph Mutawu vari kutsigira Munetsi panyaya yekuti VaKamambo vadzoserwe pabasa.
Vakafanobata chigaro chemutungamiri weZIFA VaGift Banda vati vane zvakawanda zvavari kuyedza kugadzirisa matambudziko akatarisana nenhabvu vakati vachzvizivisa munguva pfupi inotevera.
FIFA inoti sarudzo dzose dzichaitwa kuda kubvisa VaKamambo hadzisi pamutemo uye icharamba ichivatora semutungamiri wesangano iri zviri pamutemo.
Facebook Forum