Accessibility links

Breaking News

Musangano weMadzimambo Wakanangana neKuvapa Mukana weKusvitsa Zvichemo Zvematunhu Avo kuHurumende Unotanga muBulawayo


Musangano weNational Chiefs' Conference 2023, uri kuitwa Bulawayo.
Musangano weNational Chiefs' Conference 2023, uri kuitwa Bulawayo.

Musangano wemadzimambo wemazuva maviri weNational Chiefs' Conference wegore rino watanga neChipiri munhandare yeZimbabwe International Trade Fair Hall 1 muBulawayo.

Musangano uyu unonzi uri kupindwa nevanhu vanoda kusvika kuchiuru vanosanganisira madzishe nemasadunhu pamwe nevamiriri vemapazi ehurumende akasiyanasiyana.

Musangano unoitwa gore roga uyu unonzi unopa madzimambo enyika yose mukana wekuti asvitse kuhurumende zvichemo nematambudziko zviri kubata matunhu avo.

Mutungamiri wenyika, VaEmmerson Mnangagwa, vari kutarisirwa kupindawo musangano uyu neChitatu.

Dingindira regore rino, iro rinoti “Firm Cultural Foundation for Community Development,” rakanangana nekusimbiswa kwehwaro hwetsika nemagariro kuitira kusimudzira nharaunda.

Mamwe madzimambo vari pamusangano weNational Chiefs' Conference muBulawayo.
Mamwe madzimambo vari pamusangano weNational Chiefs' Conference muBulawayo.

Vachitaura vakazvimirira, Mambo Nembire, VaClemence Nembire vekuMt. Darwin, vanove zvakare seneta, vanoti musangano uyu wakakoshera madzimambo zvakanyanya nekuti unovapa mukana wekuti vasvitse zvichemo zvavo kumapazi ehurumende akasiyanasiyana panguva imwe chete.

Mambo Nembire vanoti ivo mudunhu ravo reMashonaland Central zvichemo zvavo zvikuru zvavasvitsa kuhurumende zvinosanganisira chemigwagwa vemazambuko zvaparadzwa nemvura uyewo nyaya yekuti vawaniswe makirinika nezvikoro pedyo.

Musangano uyu unonziwo wakatarisana nedambudziko rekushaikwa kwenzvimbo dzekurara dzinokwanira vanhu vose vari pamusangano uyu, izvo zvinonzi zviri kuita kuti vamwe varare mumabhazi vamwe vachirara mudzimotokari dzavo.

Dambudziko iri raita kuti mutungamiri wemadzimambo, Mambo Fortune Charumbira, vakumbire ruregerero kubva kumadzimambo nemadzishe vari kupinda musangano uyu, vachivimbisa kuti hurumemende iri kugadzirisa dambudziko iri.

please wait

No media source currently available

0:00 0:02:40 0:00
Pekupinda Napo Kuti Muone Zvamuri Kuda

Facebook Forum

XS
SM
MD
LG