Chikwata che Dynamos chapinda muma kota fainari eChibuku Super Cup chichitarisira kutora mukombe uyu kekutanga munhoroondo. Michael Kariati anotipa nyaya iyi.
Dynamos yabatana nezvimwe zvikwata zvisere zvasara kurwira mukombe uyu mushure mekutadza mikana yakawandisa asi ndokuzorova Hwahwa 1-0.
Chibodzwa chemhando yepamusoro chabva kuna Trevor Mavunga chapa Dembare kukunda nekusimudza mhemberero mumusha nechikwata ichi.
Mutsigiri weDynamos VaSilas Chingosho vanoti Dembare ndizvo nekukunda uku.
Dynamos haisati yambotora mukombe weChibuku Super Cup uyu kubvira makundano aya avambwa muna 2014.
Asi Highlanders neTriangle idzo dzakambotora mukombe uyu dzasangana muGibbo Stadium nhasi masikati,maBosso ndokukunda 1-0.
Zvimwe zvikwata zvaramba kusaririra mumakwikwi aya iBukawayo Chiefs iyo yarova ZPC Kariba 1-0 neManica Diamonds yakunda Yadah 2-0.
Zvikwata zvisere zvasara mumukombe uyu iBlack Rhinos, Bulawayo Chiefs, Chicken Inn, Dynamos, FC Platinum, Herentals, Highlanders, neManica Diamonds.
Mukota fainari emukombe uyu arikutambwa svondo remusi wa 17-18 Gunyana. Totarisa mamundano e2023 World Cup netball qualifiers.
Chikwata cheZimbabwe chirikupinda munhandare mangwana mangwanani mumutambo wacho wekutanga we2023 World Cup Qualifier pasina chimwe chavarikutarisira kunze kwekurova Botswana.
Zimbabwe ndiyo imwe yezvikwata zvisere zvakaungana muSouth Africa kurwira zvinzvimbo zviviri zveAfrica zvasara kuWorld Cup.
Kaputeni wechikwata ichi Felistus Kangwa anoti havasi kuSouth Africa kuhorodhi asi kunofadza vatsigiri vavo.
KuLiverpool, kumakundano e2019 World Cup, Zimbabwe yakasvika muma kota fainari apo yaive yakamirira Africa pamwechete neMalawi, Uganda, neSouth Africa
KuSouth Africa uku Zimbabwe iri muGroup A neBotswana, Namibia, South Africa neTanzania.
Murairidzi weZimbabwe Ropafadzo Mutsauki anoti akaita gadziriro yakasimba kukunda mugungano iri. Gungano reGroupB rine Eswatini, Kenya, Uganda, Malawi neZambia.
South Africa neUganda dzakabudirira kare kuenda ku2023 World Cup as South Africa iri kutamba muma qualifiers kusimbisa makundano aya.
Uganda iyo yanga ichifanira kuvekowo yazivisa kuti haichakwanisa kuuya. MaWorld Cup Qualifiers ayo atanga nhasi ari kupera nemugovera svondo rinouya.
Facebook Forum