Chikwata cheZimbabwe chemutambo wekiriketi chiri kupinda munhandare neMugovera mumutambo wekutanga wemaT20 chichibandana neAfghanistan chiine hukasha mushure nekurohwa mumitambo mitatu yezuva rimwe.
Chiri kunyanyorwadza mukukundwa uku ndechekuti kwapinza Zimbabwe pachinhanho chechipiri kubva pasi pasi muhurongwa hwezvikwata gumi nezvitatu munzira yekuenda ku2023 World Cup.
Zvikwata zvisere kubva mugungano iri ndizvo zvinobudirira kuenda kuWorld Cup.
Asi Zimbabwe iri kure kure yakasiiwa nemapoinzi makumi maviri nemashanu neNew Zealand iyo iri pachinzvimbo chekugumisira kuenda kuWorld Cup uku.
Zimbabwe ine mapoinzi makumi matatu nemashanu chete izvo muteveri wemaChevrons VaPartson Munyati vachiti zveWorld Cup, Zimbabwe inofanira kumbozvikanganwa.
Asi Zimbabwe ine imwe nzira yekuenda kuWorld Cup asi iri World Cup yemaT20 iyo ichaitirwa kuAustralia kubva musi wa16 Gumiguru kusvika musi wa 13 Mbudzi.
Asi simba reZimbabwe rekuenda kumakundano aya riri kutanga kuonekwa mangwana mumutambo neAfghanistan uyo vari kushandisa segadziriro yekurwira nzvimbo yavo.
Zimbabwe neAfghanistan zvasangana mumitambo gumi nemiviri yemaT20, Afghanistan ichikunda mumitambo gumi nemumwechete, Zimbabwe mumutambo mumwechete chete.
Muhurongwa hwepasi rese hwemaT20, Zimbabwe iri pachinhanho chegumi nembiri izvo muteveri wechikwata ichi VaPeter Mususa vanoti zvinoda kugadziriswa.
Asi murairidzi wechikwata ichi Lalchardt Rajput anoti veruzhinji havafanire kutarisa nhoroondo achivimbisa iye kuti Zimbabwe Ichaita nepese painogona kuti ikunde.
Anoti ari kushandisa mutambo uyu kuvaka chikwata chakasimba chichamirira nyika apo Zimbabwe iri kusangana neJersey, Singapore, neUSA muGroup A remaT20 Qualifiers.
Asi vakomana vake Blessing Muzarabani, Craig Ervine naRyan Burl vanofanira kusimudza mutambo wavo kana Zimbabwe ichida kupemberera zvekare.
Zimbabwe neAfghanistan dziri kusangana mangwana uye neSvondo, vachizopedzisa mitambo yemaT20 iyi neChipiri svondo rinouya.
Facebook Forum