Vanotungamira nhabvu muAfrica ve Confederation of African Football vadzinga Zimbabwe mumakundano e2023 Africa Cup of Nations ayo achaitirwa kuIvory Coast.
Mugwaro ravakabuditsa nezuro manheru, Caf inoti mushure mekutadza kugadzirisa kwayo kudzingwa munhabvu yepasi rese neFifa, Zimbabwe haichatenderwi kukwikwidza mumakundano e2023 Africa Cup of Nations.
Caf inoti Zimbabwe neKenya dzatadza kugadzirisa nyaya yekupindira kwehurumende dzayo muhutungamiri wenhabvu munyika izvo vakadzingirwa neFifa.
Fifa yaive yatara kuti Sports and Recreation Commission idzore pabasa bhodhi re Zifa rayakadzinga iro raitungamirwa navaFelton Kamambo asi SRC yaramba kuita izvi nenguva yakatarwa.
Sachigaro weSRC VaGerard Mhlotswa vanoti havasi kuzodzora VaKamambo pabasa kana zvikaoma sei vachiti ivo zveAfcon parizvino hazvina basa.
Zvakadaro, Caf inoti yave kutora Zimbabwe seyakundikana mugungano reGroup K umo yaive yaiswa pamwechete neLiberia, Morocco ne South Africa.
Izvi zvave kureva kuti kekutanga kubvira muna 1980, Zimbabwe haisi kukwikwidza mumakundano enyika dzemuAfrica aya.
Muongorori wemutambo wenhabvu VaNazzy Moyo vanoti kudzingwa muAfcon uku imbama yarova vese vatambi ne vatsigiri venhabvu.
Aimbotambira Caps United neDynamos Dumisani Mpofu anoti ariku nezita tsitsi vatambi vechidiki avo anoti varasikirwa nemukana wekutengwa kuenda kunze kwenyika.
VaDominic Kambeu avo vaimbove mu komiti yaitungamira Dynamos vanoti zvinorwadza kuti vatambi vave kushaiswa mukana wekuonekwa kuti vatengwe nezvimwe zvikwata.
Vanoti dai SRC yakatevera mitemo yenhabvu inoteverwa nenyika dzese Zimbabwe ingadai isiri mumadhaka mairi ikozvino.
Muteveri wemutambo wenhabvu VaBrian Manyati vanoti Caf yaive yanzwisisa nekupa Zimbabwe nguva yekugadzirisa zvinhu asi SRC ikaomesa musoro.
Vanoti kunyange hazvo bazi rehurumende iri ririkuparidza kugadzirisa nhabvu munyika nzira yacho haisi kuonekwa kwairi kuenda.
Caf muna Ndira yakatendera Zimbabwe kukwikwidza kuAfcon 2021 kunyange hazvo Zimbabwe yaive yadzingwa munhabvu yepasi rese neFifa.
Asi vaimbove nhengo yeZifa board VaFrancis Zimunya Nyamutsamba vanoti kusatamba muAfcon 2023 kunopa Zimbabwe nguva yekuvaka chikwata chakasimba pasingatariswe zvinobuda mumitambo.
Vanoti nguva ino yave nguva yekutsvaga tarenda idzva kubva kumativi mana ese enyika nekuvaka maWarriors matsva.
Murairidzi we vechidiki Lloyd Chigove anobvumiranawo naVaZimunya achiti sezvakangotika pakadzingwa Zimbabwe mu 2018 World Cup, hapana Zimbabwe zvainorasirwa nazvo neAfcon 2023.
Anoti panguva ino Zimbabwe yave kufanira kutanga kugadzirisa chikwata chevechidiki che makundano e2025 Afcon ne 2026 World Cup nekuti vatambi varipo vati kurei.
Aimbotambira Chapungu nemaWarriors Wellington Shangiwa anoti hazvibatsire kukwikwidza neve kune dzimwe nyika imo mumba musina kumira zvakanaka.
Muteveri wemutambo wenhabvu VaTerence Silumba vanoti hapana charasikirwa nacho Zimbabwe mumakundano aya sezvo maWarriors anga achizotamba mitambo yavo mune imwe nyika uyezve vanga vasingabudirire paMorocco neSouth Africa.
Parizvino, Zimbabwe haina nhandare yekushandisa pamutambo nedzimwe nyika mushure mekunge National Sports Stadium neBarbourfields dzakanzi hadzikodzere kutambirwa nhabvu yepamusoro neCaf.
Facebook Forum