WASHINGTON —
Mutauriri wemapurisa Senior Assistant Commissioner Charity Charamba varamba kuti sachigaro webato richangoumbwa reViva Zimbabwe VaAcie Lumumba vari mumaoko emapurisa sezvakataurwa nevanoshanda navo.
Amai Charamba vaudza Studio 7 kuti mapurisa ari kutotsvaga VaLumumba vachivapomera mhosva yekunyomba mutungamiri wenyika VaRobert Mugabe nemusi weChina. Vati VaLumumba vanofanira kuzvipira kukamba yemapurisa iri pedyo navo.
Pakuparura bato ravo kuAmbassador Hotel muHarare, VaLumumba vanonzi vakatukirira VaMugabe.
Amai Charamba vanoti VaLumumba vari kupomerwawo mhosva yekuti vari kushandisa mashoko eruvengo kana kuti hate speech zvisingatenderwi nesangano rinoona nezvesarudzo reZimbabwe Electoral Commission.