Komisheni inorwisana nehuwori, yeZimbabwe Anti-Corruption Commission, ZACC, inoti vaimbove mumwe wevatewedzeri vemutungamiri wenyika munguva yehurumende yaVaRobert Mugabe, VaPhelekezela Mphoko, vari kutiza kusungwa nemapurisa ayo vachipomerwa mhosva yekushandisa hofisi yavo zvisiri pamutemo.
VaMphoko vari kupomerwa mhosva yekushandisa masimba avozvisizvo mushure mekuburitsa muhusungwa vamwe vakuru vekambani yeZINARA vakanga vari mumaoko emapurisa pakamba yeAvondale.
Mutauriri weZACC, uye vari komishina, VaJohn Makamure, vanoti mapurisa avo anga chida kubvunzisisa VaMphoko pamusoro pemhosva yavari kupomerwa iyi, nekudaro vanga vawirirana kuti vasangane padare redzimhosva muBulawayo.
Asi vanoti VaMphoko nemagweta avo vazochinja vachiti vainge vakasununguka kuti vasangane pakamba yemapurisa, sakapavada kuti vaende kumapurisa ndipo pabva pangotiza VaMphoko.
VaMakamure vanoti komisheni yavo yatozivisa vashandi vose vepamiganhu yose yenyika kuti vasavarega vachibuda munyika, sezvo vari kudiwa nemutemo.
Asi gweta raVaMphoko, VaZibusiso Ncube, varamba mashoko ekuti vaive mutewedzeri wemutungamiri wenyika ava vari kutiza kusungwa.
VaNcube vati VaMphoko vari kutya kuti vakaiswa kuchitokisi vanozobaiwa jekiseni rekuvaita kafira mberi, izvo zvarambwa neZACC ichiti ndezemugotsi matsuro.
Your browser doesn’t support HTML5
Hurukuro naVaJohn Makamure