Sangano rinomirira vanotengesera mumigwagwa, reVendors Initiative for Social Transformation, VISET, rinoti rinotarisira kuti rwendo rwuno hurumende ichabatsirawo nhengo dzaro nemari munguva ino yadzisiri kukwanisa kushanda nekuda kwemutemo wekumbovharwa kwenyika.
Mashoko eVISET anouya zvichitevera kuvharwa kwenyika kwemazuva makumi matatu, kana kuti lockdown Level 4, iyo yakadzikwa svondo rapera nehurumende.
Mukuru weVISET, VaSamuel Wadzayi, vanoti mukumbovharwa kwakaitwa nyika gore rapera, nhengo dzavo dzakawanda hadzina kukwanisa kuwana rubatsiro rwaingovimbiswa nehurumende kuti rwuchapiwa vanozviitira mabasa emaoko.
VaWadzayi vanoti vatotanga hurongwa hwekutaudzana nebazi rezvemabhizimusi madiki neepakati, kuti vaone kuti vangayeukwa here munguva ino.
Studio7 haina kukwanisa kunzwa divi rebazi iri.
Your browser doesn’t support HTML5
Hurukuro naVaSamuel Wadzayi