Sangano idzva rakaumbwa nezvizvarwa zveZimbabwe zviri muSouth Africa kuti ribatsire vana veZimbabwe vangadai vari kutambura munyika iyi, re Zimbabwe United For Progress, neChitatu rakapa zvekudya kumhuri dzevasingaone dzinodarika makumi mashanu.
Mhuri idzi dzaimborarama nekupemha mumigwagwa yeguta reJohannesburg asi nekuda kwemutemo unorambidza kufambafamba kwevanhu munguva ino yeCovid-19 munyika, mhuri idzi dzakasara dzisisana chekubata.
Mukuru anoona nezvekufambiswa kwemashoko musangano reZimbabwe United For Progress, VaKennedy Mapesa Mandaza, vanove zvakare mutauriri webato reZanu PF mudunhu reSouth Africa, vanoti vakatora danho iri nekuona kuti mhuri idzi dzakange dzave kutambura zvakanyanya nekuda kwemutemo unodzivirira kupararira kwechirwere cheCovid-19 uyu.
VaMandaza vanoti mune remangwana vanotarisira kuti mhuri yeZimbabwe yakawanda ichapindawo muchirongwa chavo chekubatsira vanoshaya ichi, vachikurudzirawo vari munyika dzakasiyanasiyana kuti vaitewo zvimwechete zvekubatsira vekumusha vanenge vachitambura kuitira kuti vasazomanikidzwa kutyora mitemo munyika dzavagere.
Your browser doesn’t support HTML5
Hurukuro naVaKennedy Mapesa Mandaza