Bato reZanu PF riri kupomerwa mhosva yekukonzera mhirizhonga musarudzo dze by-election kuKadoma idzo dzakaona MDC inotungamirwa naVaNelson Chamisa ichikunda musarudzo idzi.
Nhengo yeMDC Alliance, Amai Shorayi Chiwara, vakawana mavhoti mazana manomwe nemakumi masere, ukuwo VaLlyod Nyambo veZanu PF vachiwana mazana matatu nemakumi matanhatu nerimwe.
Sarudzo dzakaitwa neMugovera idzi dzinonzi dzakaita mhirizhonga pane imwe nzvimbo yekuvhotera yepachikoro cheRimuka 1, apo nhengo dzeZana PF dziri kunzi ndidzo dzakakonzeresa mhirizhonga iyi.
Amai Chiwara mudzimai wevaimbove kanzura wemuwadhi iyi, VaMichael Gore, avo vakabviswa kuvakanzura nekuda kwekubatwa nemhosva yekukonzera mhirizhonga munaNdira gore rino.
VaGore vakawanikwa vaine mhosva vakapiwa mutongo wekugara mujeri kwemwedzi mishanu, asi vakapikisa mutongo uyu, izvo zvakaita kuti vambobuda mujeri vachimirira kunzwikwa kwenyaya yavo kumatare.
Muzvare Chiwara vanoti kukunda kwavo mucherechedzo wekuti vagari havana kufara nekusungwa kwemurume wavo VaGore.
Vanoti kukunda kwavo kwakauya nemuseredzero wekushungurudzwa nemapurisa pamwe nenhengo dzebato reZanu PF.
Mumwe wevanoti vakarohwa uye vari nhengo yeMDC, Amai Tendayi Kokera, vanoti vakarohwa nemboma muviri wose nevanhu vainge vaine mazipanga kana kuti ma machetes.
Asi nhengo yeZanu PF yakakundwa, VaNyambo, vanoti VaGore, avo vakabudiswa mujeri neChishanu, ndivo vakakonzeresa mhirizhonga apo vakatenderera nzvimbo dzekuvhotera.
VaNyambo vanoti VaGore ndivo vakatokonzeresa mhirizhonga mushure mekunge vapinda munzvimbo dzekuvhotera vachitsvaga rutsigiro, vakazongonzwawo kuti kwamuka mhirizhonga.
Wadhi 2 yaive nevanhu vakanyoresa vanosvika zviuru zvitatu. Bato reZanu PF ragara ndiro rinosimbokunda musarudzo dze by-election dzakawanda dzinoitwa munyika.
Your browser doesn’t support HTML5
Nyaya ina Arthur Chigoriwa