Chizvarwa cheZimbabwe, VaRicky Mukonza, avo vari kugara kuSouth Africa, vanoti havana kurasa hama dzavo kubva pavakapira gotsi musha wavo uri kuMarondamashanu kuChivhu, vachinotanga musasa kuPolokwane, kuSouth Africa, makore mapfumbamwe apfuura.
VaMukonza, avo vanodzidzisa zvidzidzo zvePublic Management paTswane University of Technology, vanoti vari kuramba vachibatsira hama dzavo nenzira dzakasiyana siyana dzinosanganisira kuendesa vana kuchikoro, kubatsira nezvekurimisa nezvimwe zvakadaro.
Vanotiwo vari kushanda nevamwe vadzidzisi vepaUniversity of Zimbabwe mukunyora bhuku rinodonongodza mashandisirwo emari nehurumende.
“Ndine zvimwewo zvandinoita kuno zvakaita sekubatsira vekumusha vanenge vachitsvaga nzvimbo yechikoro pandinodzidzisa, kanawo avo vanenge vachiita zvidzidzo zvavo zve masters nema dissertation avo,” Vanodaro VaMukonza.
Vanoti nekuda kwekushomeka kwemari yekushandisa muzvirongwa zvavo, vari kukwanisa kuendesa vana vangada kusvika gumi kuchikoro.
Asi vanoti ivo nemudzimai wavo vari kuronga kuti vawedzere huwandu hwevana ava kuenda pakati pegumi nevashanu nemakumi maviri mugore rino.
Your browser doesn’t support HTML5
Hurukuro naVaRicky Munyaradzi Mukonza