Hurukuro yakaitwa neStudio 7 yakabatana neMedia Centre muHarare neChitatu yekutarisisa mazuva zana mutungamiri wenyika VaEmmerson Mnangagwa vatora mhiko yekutungamira nyika, yakaratidza kuti veruzhinji vane maonero akasiyanasiyana, vamwe vachiti pane shanduko asi vamwe vachiti hapana chati chaonekwa.
Vanoongorora zvematongerwo enyika vakarerekera kubato reMDC, uye vari mutungamiri wePTUZ, Doctor Takavafira Zhou, vanoti vaitarisira kuti hurumende itsva iyi ivandudze zvinhu mukati memazuva zana aya asi kusvika pari zvino hapana chayati yaita.
Doctor Zhou vanoti tarisiro yeveruzhinji yakanga iri yekuona kuti zvinhu munyaya dzezvehupfumi zvagadzirisika here kuburikidza nekuwanisa vanhu mari, kubviswa kwema bond note, uyewo kuti mune zvematongerwo enyika mave neshanduko kubva kuhurumende yaivepo.
Asi vanoongorora zvematongerwo enyika vakarerekera kuZanu PF, VaGadzira Chirumhanzu vanoti shanduko yavepo huru kwazvo zvikuru mune zveupfumi nezvematongerwo enyika.
VaChirumhanzu vanoti vana veZimbabwe vakawana rusununguko rwekuita madiro aJojina, uyewo nyaya dzemari dziri kugadziriswa, sezvaonekwa nebhajeti raturwa negurukota rezvemari, Muzvinafundo Mthuli Ncube.
Asi Doctor Zhou vanoti hapana chikuru chekupemberera bhajeti raVaNcube sezvo matambudziko mune zveupfumi agara aripo atowedzerwa nemitero yavaisa muzvinhu zvinobatsira varombo.
Your browser doesn’t support HTML5
Hurukuro naVaGadzira Chirumhanzu pamwe naDoctor Takavafira Zhou