Munyori mukuru musangano revaiva varwi vehondo yerusunguko, reZimbabwe National Liberation War Veterans Association, VaVictor Matemadanda vasungwa pamatare edzimhosva pavanga vauya kuzonzwa nyaya yemunyori anoona nezvekuburitswa kwemashoko musangano ravo, VaDouglas Mahiya avo vakatarisana nemhosva yekutuka pamwe nekuzvidza mutungamiri wenyika VaRobert Mugabe.
Paita kuimba kwakasimba pamwe nekuchema kwaitwa nevaiva varwi vehondo yerusunguko panze pematare mushure mekunge VaMatemadanda vasungwa nemapurisa vachibuda mudare manga muchinzwikwa nyaya yaVaMahiya. Vamwe vasungwa ndiVaFrancis Nhando vanoona nezvegwara musangano reZNLWA.
Mapurisa anga achitungamirwa naAssistant Commisioner Crispen Makedenge ayo anga akapakatira zvombo asunga VaMatemadanda vachibuda mudare reHarare mejasitereti ndokuvaendesa kune mamwe mahofisi pamatare pakare, vakazovabuditsa nemukova wekuseri kwematare muchihwande.
VaMatemadanda vabva vaendwa navo kukamba yeHarare Central Police Station, apo nhengo dzesangano ravo dzanga dzichiimba dzichitevera motokari yemapurisa zvabva zvaita kuti mapurisa anga aine motokari iyi abve ari chahwiriri pamatare.
Gweta raVaMatemadanda, Amai Beatrice Mtetwa, vaudza Studio 7 vari kukamba yemapurisa ikoko kuti VaMatemadanda vanga vachi bvunzurudzwa nemapurisa asi hapana mhosva yavanga vati vapomerwa pataenda pamhepo.
Zvichakadai, VaMahiya vanzi nemutongi wedare VaVakayi Chikwekwe vabvise madhora mazana matatu semari yechibatiso kuti vatongwe vachibva kumba kwavo pamhosva yavari kupomerwa yekuzvidza pamwe nekutuka mutungamiri wenyika VaRobert Mugabe, mugwaro rinonzi rakaburitswa nesangano revaimbova varwi vehondo yerusununguko ava.
Mumutongo wavo, VaChikwekwe vatiwo VaMahiya vazviratidze kumapurisa musi weMuvhuro neChina svondo regarega kudzamara nyaya iyi yapera kutongwa mumatare.
Mumutongo wavo, VaChikwekwe vati havasi kuona kuti VaMahiya vangazonetsana nemapurisa nevari muchiuto papi vachiti mapurisa ndiwo anotusungirwa kuva chengetedza.
Izvi zvinotevera chikumbiro chehurumende chekuti VaMahiya varambe vari muhusungwa kudzamara nyaya yavo yapera kutongwa ichiti kuburitswa kwavo kwaizogona kukonzera kusagadzikana munyika.
Mushure memutongo uyu, rimwe remagweta ari kumirira hurumende panyaya iyi, VaTapiwa Kasema, vazvivisa dare kutu hurumende ichazokumbira dare kuti rimbosendeka mutongo waro kwemazuva maviri saka nokudaro VaMahiya vanga vachifanira kuramba vari mujeri.
Asi izvi zvapikiswa negweta raVaMahiya, VaHarrison Nkomo avo vati mutemo unoti VaMahiya vanofanirwa kuburitswa kusvikira hurumende yasvitsa chikumbiro chayo kudare nenzira kwayo.
Vati muchuchisi mukuru wehurumende ndiye anofanira kupa zvikonzero zvinotariswa zvakare nemutongi wenyaya iyi kuti zvinokodzera here kuti musungwa asaburitswe muhusungwa izvo zvisina kuitwa nehurumende.
VaChikwekwe vawirirana nezvasvitswa kudare naVaNkomo vakapa zvakare mumwe mutongo wekuti hapana chikonzero chasvitswa kudare nehurumende chinoita kuti VaMahiya varambe vari muhusungwa.
VaNkomo vati vafara zvikuru nemutongo waturwa nedare. Sachigaro wesangano revakarwa muhondo yerusununguko, vachris Mutsvagwa, mutungamiri webato reZimbabwe People First avo vaimbova mutevedzeri wemutungamiri wenyika, Amai Joice Mujuru pamwe nemutevedzeri wemutungamiri weMDC- T, VaNelson Chamisa ndevamwe vevanga vari mudare vachinzwa nyaya yaVaMahiya.
Amai Mujuru naVaMutsvangwa vaudza vatori venhau pamatare apa kuti havasi kufara nekushungurudzwa kuri kuitwa vakarwa muhondo yerusunguko vachiti izvi hazvitarisirwi munyika yakasunguka.
Your browser doesn’t support HTML5
Nyaya Ina Thomas Chiripasi