Mutauriri weZimParks, VaTinashe Farawu, vanoti mutumbi waVaRoy Dikinya, avo vakadonhera mugomba riri pamapopoma eVictoria Falls zuva regoredzva, wakawanikwa asi havasati vakwanisa kuutora kubva pawakadonhera.
VaFarawu vanoti hurumende, yakatungamirirwa negurukota rebazi rezvezviwanikwa, VaMangaliso Ndlovu, yakwanisa kuti pachipinda veCivil Protection Unit kuti vaedze kutora mutumbi uyu.
Vanotiwo hurumende yataurawo nevemugodhi weHow Mine uri kuMatabeleland South kuti utumirewo nyanzvi dzinogona kubatsira nekusvika pane mutumbi uyu.
VaFarawu vanoti vari kushandawo nevemhuri yaVaDikinya vachiizivisa pavanenge vasvika nguva dzose.
Mumwe wemhuri yekwaDikinya asina kuda kudomwa nezita, atenda kuti mutumbi wakaonekwa asi hausati wakwanisa kutorwa.
Wemhuri uyu atendawo kuti hurumende iri kuvazivisa pasvika hurongwa hwekuedza kutora mutumbi wehama yavo, achitiwo dambudziko ndiroro rekuti pauri pakamanika uye hapasvikiki nehwato kana kuti pashandisike chikopokopo.
Pane mutumbi uyu panonzi pakadzika mamita anodarika zana kubva pamusoro.
Your browser doesn’t support HTML5
Hurukuro naVaTinashe Farawu