Mutungamiri wenyika VaEmmerson Mnangagwa vabatana nevamwe vatungamiri venyika dzemuAfrica pamwe nepasi rose mukuchema vanhu vashaya mutsaona yendege muEthiopia.
VaMnangagwa vaburitsa mashoko avo paTwitter vachinyaradza mhuri dzose dzarasikirwa mutsaona iyi vachiti vanopa pfungwa nesimba kuvakoma nehanzvadzi nevose vabatwa netsaona iyi.
Vanhu zana nemakumi mashanu nevanomwe vafa mutsaona yekudonha kwendege yeEthiopian Airways yerudzi rweBoeing 737, iyo yanga ichienda kuNairobi, guta guru reKenya mangwanani.
Nhepfenyuro yehurumende yeEthiopia yati ndege iyi, iyo yadonhera pedyo neguta reBishoftu muEthiopia makare, yanga yakatakura zvizvarwa zvenyika dzingangosvika makumi matatu nenhatu.
Vafi vanosanganisira makumi matatu nevaviri vekuKenya, vasere vekuCanada, vanomwe vekuEthiopia, vasere vanove zvizvarwa zveAmerica, vasere vekuItaly, vasere vekuChina, vanomwe vekuBritain, vanomwe vekuFrance, vatanhatu vekuEgypt, vashanu vekuNetherlands, vana vekuIndia, nevamwe vana vekuSlovakia.
Vamwe vatatu ndevekuAustria, vatatu vekuSweden, vatatu vekuRussia, vaviri vekuMorocco, vaviri vekuSpain, vaviri vekuPoland, nevamwe vaviri vekuIsrael.
Nyika dzinoti Belgium, Indonesia, Somalia, Norway, Serbia, Togo, Mozambique, Rwanda, Sudan, Uganda neYemen dzarasikirwawo nezvizvarwa chimwe-chimwe.
Mukati mevanhu ava manga mune vamwe vana vanga vari vashandi vesangano reUnited Nations.
Ndege iyi, iyo inonzi yanga ichiri itsva, uye ichityairwa nenyanzvi, inonzi yarasana masaisai nenhandare huru yendege yeBole International Airport maminitsi matanhatu yasimuka nenguva dza 8:38 mangwanani enguva dzeku Ethiopia.