Vamwe vedzisvondo vanoti mapurisa akatyora mutemo nekurambidza kuratidzira kwanga kuchitungamirwa neMDC inotungamirwa naVaNelson Chamisa.
Mutungamiri weZimbabwe Devine Destiny, Bishop Ancelimo Magaya, vanoti pasi pebumbiro remitemo yenyika, mapurisa haana masimba ekurambidza vanhu kuratidzira.
Bishop Magaya vanotiwo zviri kuitika munyika pasi pehurumende yaVa Emmerson Mnangagwa, zvashata kutodarika zvaiitika pasi pehurumende yevaimbove mutungamiri wenyika, Va Robert Mugabe.
VaMagaya vanoti pasvika zvinhu pava kuda kuti kana vanhu vapunda mumigwagwa vasabuda mumigwagwa iyi sezvakaitika kuSudan, pamwe nezviri kuitika kuMalawi.
VaMagaya vanoti vanhu vari kushupika muZimbabwe uye hurumende inofanirwa kuona kuti yagadzirisa zvinhu kuitira kuti hupenyu hurerukire munhu wese.
Mashoko aVaMagaya anotevera danho rakaitwa nemapurisa nemusi weChina manheru rekurambidza MDC kuratidzira.
Mapurisa anoti akatora danho iri senzira yekudzivirira mhirizhonga yaakanga anzwa kuti ichakonzerwa nenhengo dzeMDC.
Asi MDC inoti mapurisa akatora danho iri zvichitevera kupindira kweZanu PF panyaya yekuratidzira kwainge kwarongwa neMDC.
VaMagaya vanoti kuratidzira uku kwakanga kuri pamutemo uye kuchiremekedzwa nebumbiro remitemo yenyika.
Your browser doesn’t support HTML5
Hurukuro naBishop Ancelimo Magaya