Mutungamiri wenyika VaEmmerson Mnangagwa vadoma mumiri weZimbabwe kuUnited Nations Doctor Fredrick Shava kuti vave gurukota rezvekudyidzana nedzimwe nyika mushure mekushaya kwa Doctor Sibusiso Moyo nechirwere cheCovid-19.
VaMnangagwa vadomawo mumiriri weChikomba mudare reparamende VaFelix Tapiwa Mhona kuti vave gurukota rezvekutakurwa kwezvinhu, chigaro chakasiiwa namushakabvu Joel Biggie Matiza vakashaya nechirwere cheCovid-19 zvekare.
VaMike Madiro vange vari mutevedzeri wqegurukota rezvemukati menyika vanenge vave mutevedzeri waVaMhona. VaAaron Mabhoyi Ncube ndivo vave mutevedzeri wegurukota rezvemukati menyika.
Mumiriri weMakonde mudare reparamende VaKindness Paradza ndivo vanenge vave mutevedzeri wegurukota rezvekuburitswa kwemashoko, chigaro chakasiiwa naVaEnergy Mutodi avo vakadzingwa basa.
Mumiri weChimanimani West Amai Nokuthula Matsikenyere ndivo vave gurukota rinomirira Manicaland vachitora chigaro chakasiiwa naAmai Ellen Gwaradzimba vakashayawo nechirwere cheCovid-19.
Mutevedzeri wemunyori mukuru wedare remakurukota VaGeorge Charamba vanyorawo paTwitter tavo kuti VaMnangagwa vavandudza dare ravo remakurukota.