Mushure mekunetsana kwemakore akawanda uye kukandirana makobvu nematate pakati pehurumende nebazi rezvevashandi reZimbabwe Congress of Trade Unions, ZCTU, nezvekuti sangano revashandi rive nemumiriri mubhodhi reNational Social Security Authority kana kuti NSSA, nyaya iyi yazogadziriswa.
Mutevedzeri wemunyori mukuru weZCTU, VaThomas Masvinge, ndivo vakasarudzwa kupinda mubhodhi iri.
Gurukota rezvevashandi, Doctor Sekai Nzenza, vanoti vave kushanda zvakanaka nevashandi.
Your browser doesn’t support HTML5
Hurukuro naDoctor Sekai Nzenza
Vaimiririra ZCTU mubhodhi reNSSA vari mutungamiri wesangano iri, VaPeter Mutasa, vakadzingwa mubhodhi reNSSA muna 2017 vachipomerwa mhosva yekusvibisa zita rekambani iyi.
ZCTU yakaedza kuti vadzokere zvekare asi hurumende yakatsika madziro.
Asi VaMutasa vanoti havasi havo kufara nematanho avanofanira kutora kana vachisarudza mumiriri wavo.
VaMutasa vanotiwo mamwe makurukota ehurumende ange achitora mukana wekushaikwa kwenhengo yavo mubhodhi kuita zvehuori zvakaona vaimbova gurukota rezvekushanyirwa kwenyika, Amai Prisca Mupfumira, vachisungwa vachipomerwa mhosva yekuita zvehuori.
Your browser doesn’t support HTML5
Hurukuro naVaPeter Mutasa