Nhumwa yesangano rinomirira varairidzi vemuAmerica reAmerican Federation of Teachers, Muzvare Smydge Perry, avo vakapinda munyika nesvondo, vapeta kuita misangano nemasangano anomirira varairidzi munyika.
Muzvare Perry vari munyika nechinangwa chekuda kuti masangano makuru anomirira varairidzi, anoti reZimbabwe Teachers Association neProgressive Teachers Union of Zimbabwe, abatane mukumirira kodzero dzevarairidzi.
Amai Perry vaudzawo Studio7 kuti masangano aya aona kukosha kwekunge varairidzi vaine simba kana vakabatana, sezvo kusabatana kuchikonzera zinyekenyeke.
Masangano eZimta, PTUZ pamwe neAmerican Federation of Teachers ose ari pasi pesangano guru rinomirira varariridzi pasi rose reEducation International.
Munyori mukuru weZimta, VaRichard Gundani, vanoti sangano ravo rinotambira hurongwa hwekuti varairidzi vashandire pamwe.
Ukuwo munyori mukuru wePTUZ, VaRaymond Majongwe, vanoti ndicho chagara chiri chido chesangano ravo kuti varairidzi vaite muonera pamwe.
