Makwikwi eAfrica Nations Cup 2021 ari kutarisirwa nhasi kusvika kwamvura yacheka makumbo nemutambo wefainari pakati peEgypt neSenegal.
Mutambo uye wakamirirwa nevakawanda sezvo paine vatambi vane mukurumbira vanoti Mo Salah anotambira Egypt neLiverpool uye Sadio Mane anotambira Senegal neLiverpool zvekareuye Edouard Mendy mubati wepagedhi weSenegal neChelsea ari kushura mare pasi rose nekuva mangoyi wemhando yepamusoro.
Egypt yasimudza mukombe uyu kanomwe, Senegal haisati yambouhwina. Vanoongorora nyaya dzezvemitambo VaBrian Musekiwa vemuMaryland America vanoti vanoona sekuti Senegal yavanoti ine vatambi vakawanda vepamusoro ichakunda Ehypt 2-1.
Nezuro Cameroon yakakunda Burkina Faso 5-3 mumapenalties mushure mekuita mangange 3-3 pakurwira chidanho chechitatu kumakwikwi aya.
Your browser doesn’t support HTML5
Hurukuro naVaBrian Musekiwa