Mutungamiri wenyika, VaRobert Mugabe, vanonzi vamisa basa mamwe makurukota avo senzira yekutanga kuvaka hwaro hwekudoma makurukota matsva achange ari muhurumende itsva.
Zvinonzi munyori wedare remakurukota, VaMisheck Sibanda, vakatanga
kutonyorera makurukota aya matsamba vachivazivisa kuti vambomiswa basa. Bepanhau reHerald rinotiwo VaMugabe vamisa makurukota ose akakundwa musarudzo yemuna Kurume kana, avo vasina kudomwa semaseneta.
Vamiswa basa vanosanganisira gurukota rezvemari, VaSamuel Mumbengegwi, gurukota rezvekuburitswa kwemashoko, VaSikanyiso Ndlovu, gurukota rezvemabasa emadzimai, Muzvare Oppah Muchinguri, gurukota rezve mvura, VaMunacho Mutezo, gurukota rezvemigodhi, VaAmos Midzi, gurukota rezvekurima, Va Rugare Gumbo nevamwe.
Vamwe vakuru muZanu-PF vanoti VaMugabe vaneta
nekumirira mutungamiri weMDC, VaMorgan Tsvangirai, kuti vapinde muhurumende
yemubatanidzwa. Hurongwa hwekumisa basa mamwe makurukota aya hunotevera musangano wakaitwa pakati paVaMugabe nemutungamiri wechimwe chikwata cheMDC, VaArthur Mutambara.
VaTsvangirai vanoti VaMugabe vanofanira kutanga vabvuma kugovana navo masimba zvakafanira, kuitira kuti bato ravo rigotsigira kuvandudzwa kwebumbiro remitemo, kuburikidza neConstitutional Amendment Bill Number 19.
Kana izvi zvichinge zvaitwa, VaTsvangirai vanoti vanobvuma kutora mhiko yekupinda muhurumende yemubatanidzwa.
VaInnocent Gonese ndivo chief whip veMDC inotungamirwa naVaMorgan Tsvangirai mudare reparamende.
VaGonese vaudza Blessing Zulu weStudio 7 kuti VaMugabe vakaumba hurumende voga vanenge vati nhaurirano dzapera.
Mutevedzeri wemutauriri weMDC inotungamirwa naVaArthur Mutambara, VaRenson Gasela, vanotiwo VaMugabe vakaita humbimbindoga vanenge vazvisikira moto muziso.
Sachigaro weNCA, uye vari nyanzvi munyaya dzemitemo, Doctor Lovemore Madhuku, vanoti zvaitwa naVaMugabe hazvina zvazvinoreva nekuti vakaita zano ndega, vanozozvidemba mangwana.