MDC inotungamirwa naVaMorgan Tsvangirai,
inoti iri kushamiswa nedanho riri kutorwa neZimbabwe Electoral Commission pamwe
ne ZANU-PF rekuenderera mberi nesarudzo dzema by-elections, zvisinei nekuti
mapato makuru matatu ezvematongerwo enyika, akabvumbirana kuti hapana sarudzo
dzinofanirwa kuitwa mukati megore rimwe kubva pavakanyorerana pasi
chibvumirano.
Sarudzo dzetsvaga nhengo dzeparamende
dziri kuitirwa munzvimbo nhanhatu dzinosanganisira Gokwe-Gumunyu zvichitevera
kushaika kwakaita Va Ephraim Mushoriwa vebato reZANU-PF, kuMatobo North,
zvichitevera kugadzwa kwakaitwa Va Lovemeore Moyo, semutauriri weparamende.
ukuwo kuGuruve North, kwave kutsvagwawo nhengo yeparamende mushure mekushaika
kwaVa Cletus Mabharanga nhengo yeZANU-PF.
Sarudzo idzi dzakatarisirawo kutsvaga
nhengo nhatu dzedare reSeneti muChegutu, zvichitevera kugadzwa kwakaitwa Mai Edna
Madzogwe semutungamiri wedare reSeneti, ukuwo kuchiredzi kwave kudiwa Seneta
mushure mekugadzwa kwakaitwa Va Titus Maluleke veZANU-PF sagavhuna weMasvingo.
Gokwe South yakatarisirwawo kuita sarudzo
zvichitevera kugadzwa kwaVaJaison Max Kokerai Machaya veZANU-PF, sagavhuna we Midlands.
Mutori wenhau weStudio 7, Carole Gombakomba, aita hurukuro naVaDenis Murira vanoona nezvesarudzo mubato re MDC inotungamirwa naVaTsvangirai, avo vanoti ZANU-PF yaratidza kuti haisi pachokwadi nekuita sarudzi idzi, zvisinei nekuti pane chibvumirano chiripo pakati pavo
Ukuwo ZANU-PF inoti yakagadzirira kupinda musarudzo dzose dzichaitwa munyika, zvichitevera chisungo chakabuda ne Ccentral Ccommittee yebato iri. Kozotiwo MDC inotungamirwa naVaArthur Mutambara inotiwo kana pasina mutemo wadzikwa wekuti pasaitwe sarudzo, vachakwikwidzawo musarudzo idzi.Carole Gombakomba weStudio7 aitawo zvakare hurukuro nemunyori anoona nezvesarudzo mubato iri, VaPaul Temba Nyathi, avo vanoti kana chibvumirano ichi chisina kuita mutemo, vachakwikwidza musarudzo idzi, zvichienderana nemutemo uri munyika iye zvino.