Bato reMDC kuManicaland rinoti vaimbove varwiri vehondo yerusununguko, pamwe nevechidiki veZanu PF kuBuhera South, vachitungamirwa nemutevedzeri we Zimbabwe National War Veteran Association, VaJoseph Chinotimba, vari kuenderera mberi nekutyisidzira uye kushungurudza vanofungidzirwa kuti vanotsigira bato rinopikisa mudunhu iri.
Bato
iri rinoti kutanga kwesvondo rino, VaChinotimba vakaita musangano nemasabhuku
vakavaudza kuti vaenderere mberi nekuomesera nhengo dzeMDC, zvisineyi
nenhaurirano dzanga dzichiitwa pakati peZanu PF neMDC, idzo dzaikurudzira
kumiswa kwemhirizhonga.
Zvinonzi VaChinotimba vakaudza masabhuku aya
kuti vanoziva kuti MDC iri kuda kubata vanhu kumeso nekunyepera kupinda
munhaurirano.
Studio 7 haina kukwanisa kunzwa kuna VaChinotimba, kanawo Zanu PF, pane zviri kutaurwa neMDC. Dzimwe nhengo dzeMDC dzakanga dzambotiza misha yadzo, dzinonzi dzakarohwa mushure mekunge dzaedza kudzokera kumisha yadzo kuBuhera kwakare.
Vamwe vevakarohwa ava vanonzi vari muchipatara
chekwaMurambinda uko vari kurapwa.
Mamwe mashoko atatambira anotiwo vanozviti vakarwa hondo yerusununguko kudunhu reTshitshi, kumaruwa ePlumtree, vari kuramba vachishungurudza vatsigiri veMDC vachivarambidza kugaisa chibage chavo pazvigayo zviri munzvimbo iyi.